L'Institutu de L.luarca va "liberar" llibros estes pascues d'avientu. Les liberaciones de llibros entemecen lo lúdico y lo cultural. Yo, una vez que me sentí patriciu romanu, quinxi declarar liberta una novela (magnífica) de Naipaul. Pa decir tola verdá, na biblioteca de casa quedaba servíu con una esclava ximielga. Posé "El curandero místico" nun bancu d'un parque y sentéme notru cola cara tapada, cinematográficamente, pola prensa del día, bastante apartáu como pa nun paecer relacionáu col espósitu pero, al empar, bastante cerca como pa ver a qué manes diba parar. Pasaron los minutos y con ellos xente de toles edaes y tolos pelos. Naide adoptó al Nobel. Dellos ignoráronlu, dellos miráronlu con rocea, como a paquete bomba (el llibru-bomba: una idea con pocu futuru terrorista ente nosotros, más por llibru que por bomba). La única que demostró un plizcu d'interés fue una palombina que se posó enriba la novela y picotióla poco enfotada. A la media hora púnxose a orbayar. Les gotes empapaben murnia, cantábricamente la ilustración caribeña de la cubierta. Indignáu por aquel despreciu, recuperé la obra y llevéla de vuelta pa casa. Sequé-y la pingadura y coloquéla otra vez xunto la hermana. Tan agradecida me quedó, depués del sustu que pasare viéndose güérfana na vía pública, que me recompensó llambiéndome les manes nuna segunda lectura tovía más prestosa que la primera.
Como cualquier tantu por cien de cero da cero, nun podemos saber con qué IVA virtual decidieron los profes del institutu valdesanu gravar los llibros que liberen: si col 4% superreducíu o'l 21% xeneral. Esti asuntu nun ye menor. Tendemos a confundir el productu col soporte, de la mesma manera que tamién confundimos cultura y ociu. Un 4% pa "La Regenta" abúltame un IVA abusivu, y un 21% pa "Los mejores chistes machistas" (VV.AA. Robinbook, 2010) paezme mui, mui poco. ¿Quién puede defender qu'estos dos llibros puedan atechase baxo'l mesmu paragües cultural? Igualmente, tampoco me convence que se pida idénticu impuestu pa una representación de "La vida es sueño" que pa esa tontería titulada "The Hole" (sé bien lo que digo? ¡ejem!) qu'atarraquitó los escenarios asturianos estos meses d'atrás. Nomenón: el papel o les tables del escenariu nun basten pa entronizar un testu na categoría de cultura.
En fin: discúlpome por esta digresión impositiva: yo taba col esperimentu bibliófilu del Institutu de L.luarca. Nel primer párrafu quedó claro que nun soi optimista en materia de liberación de llibros (como tampoco lo soi en materia de liberación de persones si l'elementu liberador ye esa cosa rancia que llamen "burlesque"). Pero tamién ye verdá que yo, aquella tarde que me sentí arrogante, nun di noticia a LA NUEVA ESPAÑA del eventu, como sí fixeron, acertadamente, los profes del institutu valdesanu. Seguro qu'a ellos-yos sal meyor.
