Disfrute suéname a poco: fruición ye la palabra: un gozu tan grande que la baba resbaria pel cantu la boca abaxo y los esfínteres pónense bobos y afloxen. Esa impresión, la d'una fruición colectiva, catártica, sacaba ún el xueves pasáu del relatu que Pablo Tuñón fexo pa esti diariu de l'asamblea xixonesa de Podemos. Estudiábase la conveniencia o non de llegar a un acuerdu d'investidura col PSOE de Pedro Sánchez.
La cosa nun quedó clara: respiren Javier Fernández y el so cercu. Notra coyuntura, la indecisión podía mandar pa casa disgustaos a los participantes. Nun fue eso, polo visto, lo que pasó en Xixón. La xente disfrutó con fruición de los actuales apuros socialistes. Usáronse espresiones como "táctica", "jaque" o "crujir de cimientos" (esta última inspiraríala'l reciente terremotu del sur, lo más seguro). Un estratega asistente esplicó les razones poles que ye prioritario acabar col PSOE. Ye mui guapo eso de la estratexa, mui entretenío. Pero ún dulda que cinco millones de ciudadanos practiquen esi xuegu. Paez más normal pensar que votaron una fuerza nueva d'izquierdes pa que-yos igüe problemes, non pol placer únicu de ver arrastraes pelos baxos fondos dickensianos de la miseria, la mendicidá y la prostitución les que notru tiempu fueron orgulloses y principesques sigles polítiques. Si al personal-y da por pensar que los sos votos son puntos nun xuegu d'estratexa, igual diz ahí vos quedáis.
Tamién camienta ún que la militancia socialista local (y l'asturiana en conxuntu) debió arregañar los dientes lliendo la noticia. "¡Cabrones! ¡Míralos, cómo-yos presta!" Sí, présta-yos? ¿por qué será?
Igual ye que yo nun m'enteré, pero da la impresión de que'l PSOE tovía nun se formuló (o polo menos nun dexó trescender al públicu) les preguntes esenciales del momentu presente: "¿Por qué nos odien d'esta manera?, ¿a quién ofendimos estos años que tuviemos nel poder?, ¿cómo los ofendimos?" Porque la xente que blincaba esta selmana en Xixón, felices cola llamuerga política na que tán atascaos los herederos de Pablo Iglesias I, nun yeren antizapateristes de la derechona mediática nin homófobos o antiabortistes descontentos col relax moral propiciáu aquellos ocho años del puñu y la rosa (que pueden acabar siendo los últimos). "Entós, ¿qué-yos fiximos a estos pa que nos odien tanto o más qu'a Rato o a Rajoy?, ¿qué-yos fiximos a los ciudadanos de Xixón qu'acudieron a la consulta que refugó a José María Pérez d'alcalde?"
Una pista, apreciáu socialdemócrata autointerrogativu (si ye qu'esistes): va unos años, taba yo pa pagar na caxa d'una conocida superficie comercial, esa que vertebra España casi tanto como la Liga, usté ya sabrá a cuála me refiero. Delantre tenía un conspicuu miembru del PSOE local, conceyal más que reiterativu: podía pensase qu'inmortal. Diba sacando del carru los productos de la compra y poniéndolos na cinta, ente ellos, rollos de papel de báter perfumaos.
Sí: perfumaos.
Hai coses contra les que nun puede'l perfume. Polo menos, el perfume delicadamente orbayáu enriba una fueya de papel de báter. Nun lo ver ye de ciegos; nun lo goler, de fatos. Esi día, naquella cola, dime cuenta de que nun nos diba vagar el cambiu en Xixón.
