Artículu 17 del reglamentu publicáu pol Ayuntamientu de Piloña referíu a la muestra de caballos que se va celebrar con motivu de la Feria de Abril del Infiestu: "Los jinetes participantes en el desfile del domingo día 1 de mayo de 2016 deberán llevar el atuendo adecuado para tal ocasión, acorde con el ambiente del evento."
¿Ein?? ¿A qué atuendu "adecuado" y "acorde" col ambiente caballista se refier el bandu? ¿Serán bombachos y ponchu gauchos? ¿Chaquetón escarlata, botes de caña alta y casquetucu negru pa la caza de raposos a la británica? ¿Camperes, muslera de cueru, xilecu y sombreru Stenway de vaqueru texanu? ¡Nomenón! Quier decir que los participantes tienen que dir disfrazaos d'andaluces (dándose'l casu de nun lo ser, claro).
Y, entós, ¿por qué nun lo pon directamente? ¿Engáñome o a los responsables municipales da-yos apuru ser esplícitos, como si pesare enriba d'ellos una sombra berlanguiana vergonzante? ¿Piensen, en realidá, que promocionen un espectáculu ridículu y friki por atópicu? Pues mal. En Xixón ya se celebra, pel veranu, un Zombie Walk y un desfile Star Wars, y toos tan contentos. ¿O ye más vergonzoso querer ser andaluz que zombie? ¡Hasta ahí podíemos llegar! Andalucía ye una potencia cultural: esporta saetes a la Selmana Santa d'Ovieo y, ya los vemos, la Feria de Abril a Piloña. Tamos pendientes de descubrir en qué pedanía malagueña o gaditana celebren el festival de l'ablana con llucimientu de dengues y monteres picones o canten una tonada'l 8 de setiembre: el que lo sepa que lo cuente, por favor.
Abúltame una pretensión respetable y hasta obligada facer por llenar, anque seya un final de selmana, los restaurantes y chigres del Infiestu, que tan mala caída d'infraestructures tien. Pero nun sé quién pudo pensar qu'una copia de la feria sevillana? pálida ye poco: esangüe, cadavérica, podía ser la solución. Tien que ser alguién que nun vio "Bienvenido Mr. Marshall" o, si la vio, nun la entendió. De toles maneres, como la cosa ya rueda, permítame'l consistoriu piloñés una propuesta: asuman ustedes, abiertamente, el puntu berlanguianu del eventu. Salga'l señor alcalde, Iván Allende Toraño (PSOE); la señora conceyala de Cultura y Fiestes, Azucena Iglesias García "Viri" (ídem); la cabezalera opositora del PP, doña María Teresa González Torrado y don José Antonio Méndez Díaz, solitariu representante de Vecinos Independientes de Piloña (¿independientes de Piloña?), elles de faralaes y ellos con chaquetilla y tocaos a la cordobesa, precedíos de la banda de música local con asomeyada indumentaria "adecuada" y "acorde", los cuatro del brazu tapando la calle Cuadonga y cantando, gayoleros y sonrisones: "Os recibimos, americanos, con alegría. / ¡Olé mi madre, olé mi suegra y olé mi tía!" Vídeo a Youtube y, en 2017, nun entra la xente nel Infiestu. Un esfuerzu en bien del conceyu, señores representantes.
miliorodriguezcueto.wordpress.com
