Esti Güevu Sal Quier

Cebolleta y Whatsapp

Llamazares enfréntase a una dura actualización d'iconos

14.05.2016 | 05:38
Cebolleta y Whatsapp

Ta disgustáu Gaspar Llamazares porque tien mieu, diz, de que lu tomen pol "abuelo Cebolleta" colo pesáu que se pon avisando contra l'alianza electoral Podemos & IU. De les palices del"abuelo Cebolleta" escapaba tol mundu pa fuera de les viñetes del DDT, hasta Jeremías, aquel loru fumador, adictu a los puros habanos de cuando'l paisanu mandó tropa contra los mambises na Guerra de Cuba. ¿Tien mieu Llamazares de que la xente tamién tea escapando d'él? ¿Nótalo a les mañanes, a la hora del pinchu? ¿Éntra-yos apurua los compañeros de partíu por dir al serviciu cuando asoma él pela puerta de la cafetería? ¿Atienden sospechoses llamaes telefóniques que los emburrien a presentase a carreres notru sitiu? ¿Descubrió a algún camarada subiendo pa escontra'l techu los güeyos en blanco mientres él predica l'apocalipsis venideru? ¿Fuxirán hasta los cipayos del verborreicu güelu Llamazares?La cosa pinta mal. El fechu de que don Gaspar se ponga nomatu él mesmu ye señal pésima. Denuncia la sombra de la inseguridá. La xente asume que los políticos traicionen pero nun-yos perdona la inseguridá. Naide vota a un políticu esistencialista. Cuando'l políticu empieza a buscase una cara verdadera nel espeyu, hai riesgu de colapsu.

Les novedaes curten o destruyen en cualquier campu de la vida, tamién na política. Paez que la vuelta que ta pegando'l colchón de la izquierda tien a don Gaspar mal a gusto, esiliáu de la pocina amañosa que-y fixere'l cuerpu con tantos años de dormida. Mutatis mutandis, enfréntase Llamazares a la disyuntiva que viví yo depués de la última actualización de WhatsApp. Al dir a contesta-y a un amigu col perconocíu iconu aquiescente del puñu col deu pulgar p'arriba, como fixere milenta veces enantes, desplegóseme un catálogu de manes que representaben variedá de races. Quedé varáu. Yo buscaba la mía, la de tola vida? la blanca. Pero, agora? coño? podía usar la mulata caribeña o la negra togolesa. Caí de la burra, dime cuenta de que, hasta aquella actualización, tolos negros del mundu teníen que declarar conformidá con un puñu blancu, y a callar. Si, pa en delantre, yo m'emperraba en seguir usándolu, ¿nun taría despreciando les demás posibilidaes cromátiques y dando señales indeseables de racismu? D'otra manera, si cambiaba al togolés (por llevar la xenofilia al estremu), ¿nun me tomaría por fatu'l receptor del mensaxe? Si los alternaba, ¿yera señal de trastornu mental con pluripersonalidá? Al final, confusu, irresolutu, volví alpasáu escapista y a la escritura: "Ta bien." Ya nun uso iconos anatómicos.

Llamazares, como me pasaba a mi, vivía contentu cuando namás había puñu blancu. El catálogu amplióse y, como ye políticu (lo que yo nun soi), reacionó virilmente defendiendo'l so puñín queríu. Pero ta viendo que la marea ye imparable y, agora, dulda. Si s'encerrisca nel iconu clásicu, va acabar por nun tener a quien-y mandar whatsapps. Retuércense-y les tripes pensando na actualización pero l'instintu de supervivencia ye fuerte y ya-y pega sartenazos na cabeza pa qu'espabile y despliegue la lista ampliada pa echa-y mano al puñín togolés. Ye home con esperiencia y contamos qu'acabe garrando la decisión políticamente correcta. Amás, nun tien la posibilidá d'escribir, como yo, porque, nel so casu, el color del puñu ye'l mensaxe.

Compartir en Twitter
Compartir en Facebook
Lo último Lo más leído
Enlaces recomendados: Premios Cine