Da la impresión de que se sobredimensionen interesadamente les dificultaes pa desbloquear el conflictu de la lista electoral asturiana de la coalición Unidos Podemos. Los del presente verbal imponen alternancia de xéneros y mayoría femenina nos tres puestos primeros, presuntos electos; los del participiu quieren a Manuel González Orviz de terceru. En gramática, el presente ye una forma verbal personal y el participiu non personal. Esi va ser el quid de la cuestión: nel repartu de la marca, a IU tocó-y la parte que nun lleva suxetu.
Hai un puntín TOC na cabezonería de Podemos cola lista cremallera. Obren los de Ripa como aquel obsesivu que tien que tocar la corteya d'un árbol sí, un árbol non de la que pasea pela ciudá: ¡coses mui males van asoceder como nun se respete esi orde! Si una cosa asusta de la izquierda (en particular d'una izquierda adolescente), y muncho más que les polítiques impositives, ye la subordinación eclesial del razonamientu al dogma. Tanta inflesibilidá, vista con distancia, abulta despreciu pa col partener, ganes d'humillalu. Más que tratu confidente que derive en fusión, impónense capitulaciones a un vencíu.
Un espectador desapegáu alcuentra que, echando pa un llau esa testeronería, toos (menos ún) podíen quedar contentos si'l primer candidatu varón de Podemos (el descontentu, claro) cambia'l puestu, elegantemente, con una compañera. Otru espectador tamién desapegáu pero, pa encima, aburríu de campañes electorales ve una solución más interesante, más avanzada y hasta respetuosa coles desixencies de los dos socios: que Orviz s'integre nel colectivu transexual. Lo de que'l caballeru-y ceda'l puestu a la dama suelta un tufín rancio, decimonónico. Esto otro ye puru progresismu. Un candidatu transexual d'IU tresforma a los de Podemos, por contraste, n'epígonos del PP, en carcundia: méte-yos un sorpaso pela izquierda nel momentu xustu del sorpaso al PSOE, nel momentu más dolorosu. Amás, tampoco tien que ser una migración definitiva. Una y buena electu, si Orviz nun s'acabare d'afayar na nueva identidá de xéneru, siempre puede volver a l'actual convirtiéndose, de pasu, nel primer parlamentariu tránsfuga de la transexualidá: el primer trans-trans, faru de l'audacia política y admiración del hemiciclu.
Yo doi idees, pero ye pa ná, porque la inevitable resolución del conflictu nun se va salir del estándar y de les persabíes referencies al interés común, a la responsabilidá cola ciudadanía y blablablá. La única novedá de la campaña n'Asturies va acabar consumida en cuatro calaes nervioses, nin siquiera sensuales, y vuelta a lo de siempre. Por eso, apelo a Orviz: transpolitícese usté y déanos una razón arcuiris pa seguir la campaña, sálvenos de la repetición de discursos, cares y banderes, de la viéspora resucitada, del despertar deprimente del día de la marmota.
