Hubo muncha presencia policial nos papeles esta selmana moribunda. Municipales madrileños detuvieron a una asturiana cerca del estadiu Vicente Calderón el día que'l Barça xugaba y ganaba la Copa, ofendíos por unes lletres impreses nel bolsu que-y colgaba del costazu (a l'asturiana, non al Barça). O eso dixeron, pero yo nun me fío. Pamidea, detuviéronla pensando que yera catalana. Debió pasa-yos cerca diciendo-y al teléfonu móvil coses como "les porres" o "les hosties" y pensaron: "¡Una polaca! ¡A por ella!" Al platu vendrás, arbeyu: si nun ye por bandera estelada?
El testu que los municipales tomaron por desacatu ye la sigla (polisémica, según se vio depués, cuando esculparon a la detenida) ACAB. Yo, hasta que lleí la noticia, nun tenía conocimientu d'ella nin sabía que se puede interpretar como "All Cops Are Bastards" (tolos polis son unos cabrones), y paezme que compartía ignorancia tala cola mayor parte de la ciudadanía. Gracies a la cultura internacional de los dos policíes madrileños, mui superior a la d'esti humilde comentarista (¿en qué institutu-yos aprenderíen eses coses?), y a la so delicada sensibilidá profesional, hoi España conoz otra forma nueva d'insultar a les fuerces d'orde públicu. ¿Valía la pena, nesti casu, instruir a la población?
Asusta descubrir a qué formes sofisticaes d'ofensa obliguen les restriciones espresives impuestes poles lleis. Puedes tener delantre les narices un desacatu a l'autoridá y nun lu ver. Pienso, por exemplu, na sigla del PP neses banderines de plásticu tresparente que los acólitos sescuden con devoción en cualquier actu electoral. Baxando la mano, les dos pes tresfórmense en bb. ¿Fai falta que siga? bb? ballena blanca? Moby Dick? capitán Ahab? Ahab, sétimu rei d'Israel? na Biblia de Casiodoro de Reina, trescritu como Acab? ¡Zas! Ya tenemos los actos de campaña del Partíu Popular tresformaos en monumentales insultos antisistema entamaos, nin más nin menos, pol presidente del Gobiernu en funciones. Sentaos na primer fila, una güelina, un señor de misa diaria y Mercedes Fernández coles banderines colgando: "¡All Cops Are Bastards!"
Dos díes depués de lo de Madrid, el poeta xixonés David González pasó pel xuzgáu por agredir a una pareya de policíes nacionales que-y picaron a la puerta casa convocaos por algún vecín intolerante coles escandaleres (hai xente mui repunante). El vate atacólos a paraguazos, nun sabemos si al gritu d'¡ACAB, ACAB! o n'espresivu silenciu poéticu. La truñida debió ser digna de cantar de xesta, con esgrima grandilocuente, amplia de movimientos, porque ún de los funcionarios sufrió averíes nel papu la pierna y nun deu de la mano (y nun hai razones pa suponer que tuviere agacháu); l'otru, en clavícula, coldu y llombu. "Épico", citando "L'home tranquilu". Si acasu, por poner un pero, resulta decepcionante saber qu'un poeta como David González, d'estirpe byroniana, curáu al fumu que pinga del llabiu, les manes decoraes con plata noctámbula y embalsamáu en cueru negru pa sustu de sombres siniestres que rebullen en portales d'ascensor de xaula, gasta paragües.
miliorodriguezcueto.wordpress.com
