Iglesias y Rivera coinciden en condenar los deberes escolares. Dixéronlo na tele, en díes consecutivos, p'alegría d'un garapiellu de rapacinos de Primaria que-yos punxeron delantre nun supuestu (pero en realidá imposible) diálogu, escenes que pedíen a gritos esi axetivu empalagosu que tan de moda tuvo va unos años: "entrañable".
Na Xunta asturiana, l'asuntu entró a debate'l xueves por iniciativa de Ciudadanos . Nicanor García, portavoz de la propuesta, quier una llei que "racionalice" los deberes porque, diz, hai muncha diferencia al respectu ente centros educativos. Racionalizar, pamidea, hai que lo entender como un eufemismu por igualar o eliminar (nun hai nada más igualitario que la inesistencia). Yo, que va trenta años que doi clase y nun pongo deberes, nun sé si son bonos o malos, pero chócame, nun partíu liberal, esi interés por intervenir l'autonomía de los centros y de los profesores. ¿Por qué la economía dirixida ye mala pero la educación dirixida non? Afirma tamién García que los docentes tenemos que facer les clases más entreteníes, sobreentendiendo asina que, hasta'l momentu, somos un sopor. Oye, igual tien razón, yo qué sé. A mi los sucesivos ministros y conseyeros d'Educación dícenme: "Esplica les subordinaes adverbiales", y yo, bobu de mi, obedezo en vez d'entruga-yos a los alumnos de qué color imaxinen ellos que ye una subordinada adverbial o de manda-yos que me pinten una montada nun pony con ales ("Montada nun pony, Christian: ¡nun pony!"). Ye bona pena que García nun espunxere la idea va unos meses, cuando se preparaba la convocatoria de les inminentes oposiciones a Secundaria. Daquella, había tiempu pa introducir como prueba final, en vez de la encerrona clásica, un monólogu humorísticu. "¿Sabéis aquello del númberu primu que nun tenía tíos?", diz l'opositor a Mates. Y el tribunal, dobláu de la risa, califícalu con un diez.
Tampoco entiendo bien lo de Podemos (limitaciones personales, seguro). Que los fíos y los nietos de les grandes fortunes estudien poco o muncho, faigan deberes o non, aprendan el valor del esfuerzu y la recompensa consecuente o a echar gomina en pelo ye cuestión menor: tienen la vida resuelta. Pero los de les clases menesteroses nun se pueden someter a esperimentos inseguros cola mesma alegría. Digo más: si se trata d'usar les aules pa escoyer ente avezar a los fíos de families con pocos recursos a la desocupación o al trabayu, la primer opción paez, más qu'atrevida, inmoral. Nun veo progresismu en criar como marqueses a los que son de cuna humilde (pero será que nun me da la cabeza pa más, repito) y tengo pa mi que nin siquiera la burguesía intelixente lo quier pa en casa. Mientres nun llegue'l final de la llucha de clases, de races, de relixones y d'equipos de fútbol, paez razonable que la escuela prepare pal mundu real, que nun ye compasible nin paga sueldos a cambiu de nada, y non pa una fantasía Disney. A mediu plazu, el contraste ente l'Arcadia feliz d'un sistema educativu complaciente y la despiadada Gotham City posterior a la última orla tien qu'acabar produciendo mozos y adultos frustraos, resentíos, caldu de cultivu pa cualquier cosa mala por venir.
Pero ehí lo tien usté: Podemos y Ciudadanos, el relevu de la política española, sospechosamente d'acuerdu en moderar los esfuerzos de los estudiantes y queriendo dar por supuesto que tolos padres comparten esi deséu. Depués, acúsennos de paranoicos a los que creemos nes conspiraciones.
