Un militante del PP, de los de munchos años de carné y presencia pública, confesábame, va poco, que l'únicu oxetivu que tien ya na vida ye ver defenestrada a Mercedes Fernández. Yo garré-ylo en sentíu figuráu, más que nada por nun me ver nel casu de tener que dar avisu a la policía. Diome a entender esti militante que'l so pruyimientu nun ye cosa rara nel partíu. Al revés: vien a ser ilusión xeneralizada. Espérase, como al maná, que Cherines, por acumulación crítica de deméritos propios o por mengua de la valedora albaceteña, pierda'l pocu apoyu que tien en Madrid. Mientres, circulen internamente chistes zapadores sobre les lluces de la presidenta, chistes que yo, como soi un caballeru, nun voi repetir equí. Del relatu del mio conocíu sacábase la conclusión de que'l PP asturianu vive lo que podíemos llamar "la espectación de los cuartos": esi rebullir nerviosu y al empar alegre qu'esperimenten los congregaos pa la celebración del final d'añu na Puerta'l Sol cuando ya cayó la bola roxa y nun falta ná pa que les campanaes señalen l'empezar d'otru ciclu.
Y a mí viénome a la cabeza Madagascar. En Madagascar, los muertos nun son difuntos d'una vez y pa siempre. A los siete años del óbitu, la familia rescátalos del caxón, desvíste-yos el sudariu, siéntalos a la mesa de casa y organiza una comida con ellos presidiendo. Hasta-yos ponen platu y vasu. Bríndase alredor d'ellos y gárrense mangaes notables que suelte la llingua y animen la conversación. El difuntu vuelve del gran pigazu y con él los cuentos familiares qu'un día protagonizó o nos que tuvo parte. "¡A, güelita!", ponse un rapaz achispáu calcándose nel respaldu la siella qu'aguanta pola calavoria entorniada de la matriarca, "¿acuérdeste de cuando me detuvo la policía pol asuntu aquel de?? Bueno, ya sabes? Aquello que nun se podía vender pero que?" La difunta, masilar inferior pingón, nun s'acuerda o nun se quier acordar. "¡Madre, cómo corríen los cuartos daquella que tu tovía yeres tu!", contribuye una fiyastra con una nota señardosa. Nos cóncanos insondables de los güeyos de la muerta impertérrita, la condensación del cuartu recargáu quier formar una llágrima.
Pero nun hai que s'engañar: en Madagascar, como equí, la xente distingue a la perfeción ente los vivos y los muertos. La razón de la folixa ye, xusto, que por fin pasó'l plazu pa dar entierru definitivu. El sudariu résgase y repártese ente los asistentes y, depués, el muertu dexa pa siempre la casa camín del sucu. Eso ye lo que se festexa: desfacese d'él, d'ella. El militante del PP describíame, a la so manera, una d'estes celebraciones antiluctuoses de Madagascar. Falten el postre, el café, la copa y el puru pa despedir a Cherines como a cualquier muerta malgache.
