Munchu mal humor, munchu enfadu na recta de meta electoral. El senador Álvarez Areces anunció pleitu contra Unidos Podemos por difamación, la Federación Socialista Asturiana denunció-y a la policía un ataque hacker que-yos acuriosó / descuriosó (escueya al so gustu) el programa electoral na web y l'arzobispu d'Ovieo arengó a la feligresía contra les agresiones del apostoláu laicista. Nos tres casos, los denunciantes, lo mesmo les persones físiques que l'ente impersonal, tán fechos a tener mandu en plaza, militen o conformen ilesies que se pensaben eternes y enfrenten una crisis d'eso que se vien llamando sorpasso y güel a cosa tovía peor, una crisis tan amarga que ye quien a tresformar un franciscanu en dominicu.
Coincidió que fueron díes de lluna llena. Dicen los que se dediquen al estudiu de la influencia de los cuerpos celestes que, con lluna grande, les feríes sangren más y les persones tamos nervioses, agresives. Será eso, porque paez que nervios hai. L'amenaza de derrota descompón les figures y ábre-yos la esclusa a les quexes, heraldos de la desesperación.
En mediu de tantu alteramientu, ye un gustu ver la semeya que nos dexó'l Partíu Popular el martes nel mercáu de La Pola. Susana López Ares, Mercedes Fernández y Beatriz Polledo, sonrientes, ofrécen-yos a los ciudadanos sidra y quesos d'Asturies. A los llaos, López Ares y Polledo, sidreres, aguanten un par de botelles ensin descorchar (una per cápita), caúna nun ángulu delicadamente abiertu y opuestu que, en conxuntu, marquen la hora feliz de tolos relós en publicidá: les diez y diez. La exa de la rotación d'aguyes ye Cherines, evidentemente nel centru. Na mano izquierda enseña un folletu que más paez carátula de discu de 45 rpm colos grandes ésitos del candidatu Rajoy. Na derecha y, naturalmente, más alto, la conspicua antibablista aguanta un cachiquín de quesu "ahoga el pollo" roxu col qu'ilusiona a la parroquia, una promesa, política por metafórica, d'aclimatar a esta tierra'l milagru bíblicu alimenticiu. Nun me cuesta imaxinar con qué ansia acudiríen al reclamu dos especies inescusables: los militantes meritorios y los tiraos polesos: unos a comulgar de mano de la sacerdotisa, otros col afán investigador del que sube opiniones y puntuación a la web vivodebaldre.com:
"El quesu, aceptable. El serviciu, un desastre: la camarera ofrecíalo colos deos."
Pues mal, doña Mercedes. Hai normes hixéniques al respectu. El látex procede, nun hai que lo aborrecer. Y nun tamos diciendo que tuviere usté les manes puerques, pero, ya sabe: la muyer del César (esi que da vueltes a 45 revoluciones) nun basta con que sea llimpia: tamién tien que lo paecer.
miliorodriguezcueto.wordpress.com
