Por una vez, perdóneme si me pongo estupendu: ya avisé yo, nel últimu artículu, que lo de los gochos monteses invasores nun yera asuntu como pa que-y cayere embaxo al consistoriu carbayón. Esta selmana vimos, nun vídeo de smart-phone, el primer alcontronazu humanu-porcín en suelu del conceyu. Una banda de pandilleros cuadrúpedos acosó y amenazó a una pareya bípeda que comía pacíficamente un tentempié nuna de les meses al usu de la Pista Finlandesa. Los gochos salieron, traicioneros, d'ente los matos y dieron vueltes alredor de los asediaos como aquellos sioux de película de vaqueros, caballeros en mustang pintos, que cercaben, berrando, l'aniellu defensivu de la caravana de colonos. La colaboración valiente del perru de la familia (nel papel de Gary Cooper) fue fundamental pa refugar l'ataque. Esta vez nun hubo baxes.
Mientres, otra banda de gochos, estos inmigrantes del Oriente remotu (Vietnam, non Pimiango), resístese a entregase a la municipalidá depués de que les pales-yos tiraren embaxo les corripes de La Malata. Los empleaos de la perrera municipal dicen que nun son quien a echa-yos el llazu porque nun tienen pescuezu, evolución anatómica perconveniente que recuerda a la d'algún antiguu responsable de la FADE. Campen pelos parques de La Corredoria, asilvestraos. Un vietnamita asilvestráu ye un enemigu respetable, nun ve rival grande pa él. Albidro tiempos épicos pa la policía ovetense.
Lo fundamental, agora, ye aplicar una política de cortafueos. Quiero decir: que los mansos presos nel archipiélagu gulag espardíu per toa Asturies nun tengan conocimientu d'esti exemplu rebecu. Si s'esparde la noticia d'una rebelión, si guaña'l sueñu de la llibertá porcina y, peor tovía, si ente los fugaos de la Pista Finlandesa y los del Viet Cong s'establez una alianza (¡Dios nos llibre!) encarnada nun cabezaleru carismáticu de serdes dures y urníu fácil, vamos tener problemes. La xente de les corripes tien muncho que vengar: anonimia, celdes d'aislamientu, execuciones sumaries? Acuérdome tovía d'un probe desgraciáu de 150 kilos que nos escapó va años a la familia, d'un blincu inesperáu cuando ya lu dábemos por difuntu, d'enriba'l duernu, y, col corón espetáu y xingándose embaxo'l pescuezu, llevónos un pedazu curiosu corriendo tres d'él pela carretera alantre, camín del Puenti d'Arcu. Yo creo que quería más tirase al Nalón primero que morrer a manes d'aquellos funcionarios de prisiones d'Al-Asad. Y, a cambiu de tantu sufrimientu inmemorial, la única compensación asturiana fue prohibir la piesca'l gochín engrasáu primero que les corríes de toros.
La crisis de los gochos monteses cala na ciudadanía. Agora mesmo, toi seguru que, n'Uviéu, preocupa muncho más que la formación o non de Gobiernu en Madrid. Aporto un documentu oral y doi palabra de que nun ye ficticiu. En Xixón, un par de paisanos mayores comenten el casu:
-¿Viste lo d'Oviedo, ho? Tienen una plaga jabalís.
-¡Y nun son pa con ellos!
-Ye que ta infestao.
-Ye too esa mierda d'ecologistes, que viven toos na calle Uría y nun dan permisu pa que los maten a tiros. A ellos nun-yos joden los güertos.
-¿Oíste?, ye que te los ponen pates arriba. Fózenlo too, acaben con too. Son más malos que la hostia.
-Son como los de Podemos.
miliorodriguezcueto.wordpress.com
Cola ayuda de la Conseyería d'Educación y Cultura del Principáu d'Asturies
