Decepcionante'l planteamientu "güelguista" de la Confederación Española de Padres y Madres del Alumnado (denominación, pa empezar, incorrecta, porque "alumnado" ye un sustantivu colectivu, fai referencia al conxuntu de los alumnos, y nun hai pareya que dea pa tanto). Empixáu cola convocatoria contra los deberes escolares qu'anunciaron los medios de comunicación y simpatizante, a priori, con cualquier iniciativa que se coordine cola natural tendencia a una mayor entropía y caos del universu, entré na web de la CEAPA pa conocer los detalles. Ná. Puede descargase una circular engorrosa (anque políticamente percorrecta en materia de xéneru gramatical) que, lleída con calma, resulta ser una petición del tipu "por favor, señor/a docente, nun-y ponga deberes al neñu/a que'l domingu queremos salir col coche". ¿Y pa eso hubo una Revolución Francesa?
El planteamientu ye, según se quiera ver, inocente o patéticu. La CEAPA propón-yos a los padres que-yos comuniquen a los profes, mediante escritu, que nun los "autoricen" a que-yos pongan deberes a los fíos. Cito'l modelu, descargable tamién (ignore lo poco elegante de la redación: l'autor nun fexo los deberes de Lengua cuando tocaba): "...durante el mes de noviembre, no autorizo a que le pongan deberes escolares con la intención de que sean realizados fuera del centro educativo durante los fines de semana." Décades lleven los docentes poniendo deberes ensin ser conscientes de que, a tal efectu, facía falta autorización de la familia. Per esi camín, llegará'l día que dellos padres nun autoricen al profe de Ciencies a tratar la evolución, al d'Historia la Guerra Civil o al de Lengua a esplicar que duplicar los xéneros en sustantivos y axetivos ye una redundancia antiestética.
Pero vamos suponer qu'algún docente nun atiende la petición y pon deberes (algún docente raru, porque "el profesorado, con carácter general, atenderá vuestra petición por dos razones: la inmensa mayoría está de acuerdo con la campaña (¿?) y no existe base legal que respalde una negativa a vuestra petición." ¿Y pa cuántos millones de coses más nun habrá lexislación dictada en negativo? Pues, el llunes, l'alumnu presenta una "Comunicación al/a (¿?) docente de mi hijo/hija/tutelado-a (¿por qué nun repiten equí "tutelada"?, ¿será que son munches lletres?) de lo sucedido el fin de semana con relación a los deberes que se mandaron a pesar de mi escrito no autorizando a que ello ocurriera." ¡Qué vueltes pa nun decir nada! "Dado que, a pesar de mi comunicación previa, los deberes escolares se han mandado desoyendo mi no autorización (porque, ¿quién ye'l profe, sinon un humilde lacayu, pa desoílos? ¡Y estos de la CEAPA, tan aficionaos a la familia lésica d'"autoridá", descríbense como entidá progresista! ¡Y son los de la escuela pública!), le comunico que en virtud de los derechos que me asisten, he priorizado las actividades familiares como no podía ser de otra manera (Y, ¿por qué los deberes nun entren dientro la categoría "actividaes familiares"?) y que, por tanto, los deberes escolares no han podido ser atendidos en su totalidad /en parte por ser ello materialmente imposible." Amigos de la CEAPA: nun esiste nada llamao "no autorización". Pa cubrir esi significáu úsase'l términu "desautorización", pero igual tamién son políticamente incorrectes les palabres qu'empiecen con "des-" y yo nun toi al tantu. Amás, por supuesto qu'a los padres los asiste'l derechu a deci-yos a los fíos que nun faigan los deberes. Esi ye'l quiz de la cuestión: les families siempre tuvieron esi derechu y, como bien sabemos los docentes, una parte d'elles exércelu, valientemente, ensin falta d'apelar a l'apatía solidaria de les que tán más por facelos, que tamién son un puñáu curiosu. Siempre hubo alumnos que nun faen los deberes y sigue y seguirá habiéndolos. Nun se-yos piden a la entrada del cole o del institutu pa dexalos pasar al aula. Y otres families, efectivamente, fastídiense y echen tres y cuatro hores cada tarde supervisando'l trabayu de los fíos (eso tamién me paez que se pueda llamar conciliación familiar).
Nun digo quién tien razón y quién s'enquivoca, ye un tema que tovía nun resolví nos 30 años que llevo dando clase, pero toi por asegurar que l'anestesista xefe del HUCA llevó siempre fechos los deberes que-y punxeron, y l'alegre compañeru del tetrabrik del parque, non. Ya sé qu'esto que digo ye tendencioso, y que nun facer los deberes nun condena al tetrabrik (véase Cristiano Ronaldo? de momentu), nin tampoco vas llegar necesariamente a anestesista xefe del HUCA por facelos. Pero, oye, si me tienen qu'anestesiar, toi por pregunta-y al de la xeringa, cuando s'incline a espetámela na vía del brazu, si facía los deberes de neñu. Bah, bobu? por dormime un poco más tranquilu.
