Alfredo Robles, el neurólogu qu'esaminó a Fernández Villa, aprobólu. Ye de los pocos casos nos que l'esaminandu quería más suspender: mala suerte. Aprobólu ensin nota, eso sí. Nun garantiza que Villa pueda entender testos revesosos, como los que produz un xuiciu. Falta saber si esa carencia ye nueva.
Mui interesante esta faceta de la profesión de neurólogu: la forense. Les series americanes trabayen namás l'aspectu porcayón de les investigaciones forenses: cuerpos podres comíos por merucos qu'apaecen al desatascar desagües. Esto otro ye más llimpio. La podrez (si se da) hai que la buscar nel intelectu o nel espíritu del sospechosu. Y, si'l neurólogu forense ye quien a determinar qu'alguién ta en condiciones de declarar, suponémos-y, tamién, competencia p'apuntar, con deu revelador, p'aquella d'ellí o pa esti otru d'equí que tán en condiciones de callar, cosa, les más de les veces, más abegosa. Puntu y aparte.
Javier Fernández fexo declaraciones esta selmana, entrevistáu en La 1 de Televisón Española. Hubo un momentu brillante: cuando-y pasen una grabación de Carles Puigdemont falando un catalán perdifícil ("El disseny está fet i el disseny no es toca..." "Haurem estat preparant les lleis..." "...es convocará el referèndum...", etc.). A Fernández escápase-y una sonrisa nerviosa y lleva'l deu índiz al parietal derechu nun xestu qu'una persona desconocedora de la modélicu educación del presidente asturianu podía entender como referencia a la salú mental de Puigdemont pero que los que seguimos con atención al de Mieres sabemos que yera señal de nun entender gota. Ehí lu tenemos: un home d'Estáu español al que-y entra la risa cuando oye un idioma español que nun entiende (y esto último casi tien más delitu, vista la complicación de les frases). El locutor del programa echó-y un gabitu pa disculpalu colos subtítulos, llamándolu, de pasu, cegaratu: "Tenemos los monitores lejos". ¡Ah, pel parietal pasa la patilla de les gafes! Y ofreció-y la tradución sobre la marcha.
Sigue la sesión ente caricies amorosiegues de los entrevistadores, xente d'orde y poco amiga d'aventures polítiques, como'l propiu Fernández, y vuélvese a la cuestión federal ensin pone-y esa etiqueta. Fernández, a lo primero, ta bien: "Estoy hablando de nación en el sentido de sentimiento, que con los sentimientos se discute muy mal." Pero, al momentu, enriédase conceptualmente: "En términos constitucionales entendemos que sólo hay una nación porque sólo hay una ciudadanía." Vaya: dar por sinónimos nación y ciudadanía ye'l viciu clásicu del nacionalista. D'un paisanu d'izquierdes espérase que nun caiga nesos tracamundios peligrosos. ¡La clase, Fernández, la clase! Les izquierdes nacieron pa defender un sector social desfavorecíu. Si aspiren a la totalidá del censu, ¿en qué se diferencien de les dereches? Asina-yos va.
El tonu amabilísimu de la entrevista nun podía acabar más que planteándo-y a Fernández la posibilidá de convertise en secretariu xeneral del partíu. "Si alguien me lo dice, me ataré al palo mayor, como Ulises", ponse él, simpaticón. Y ríen-ylo. Ya. Ye mortalmente peligrosu'l cantar de les sirenes, aquelles arpíes carnívores cola larinxe de Joselito. Pero, atención: Ulises quinxo oíles cantar. A los marineros púnxo-yos cera nes oreyes, pero él amarróse a un palu col tímpanu a teyavana porque quería sentir que lu llamaben. Y Fernández, como Ulises... ¿eh?
Pero, ¿y si resulta que la sirena ya cantó por sevillanes y a Fernández nun-y dio tiempu a facese con unos tapones de silicona y, agora, hipnotizáu y inconsciente, gobierna la nave, teledirixíu, rumbu a peñes traidores? Quieren avisalu coros lacrimosos de percebes enlutaes pero canten más crespo que la sirena y Fernández tien la oreya fecha al dulce seséu meridional. La nave ta perdida. La sirena canta y Ulises declara. Señor neurólogu forense, ¿usté qué diz?
Cola ayuda de la Conseyería d'Educación y Cultura del Principáu d'Asturies
