La Nueva España

La Nueva España

Contenido exclusivo para suscriptores digitales

Esti Güevu Sal Quier

Contra'l pragmatismu

Brindes y deseos pal nuevu añu

Contra'l pragmatismu

Una clínica xixonesa publicítase estos díes na radio como recursu pa los Reis Magos. "Regálale una mamografía a mamá", vien a dicir l'anunciu. Tamos a un pasu de que Melchor-y traiga a güelito un vale por una misa de réquiem.

Pa regala-y una mamografía a to ma, tuviesti que t'empadronar, n'independizándote de la familia, en Villa Resentimientu. Eso, o ser mui pragmáticu. Nun sé de cuála de les dos posibilidaes roceo más. Esta dulda, asúmolo, ye mui minoritaria, personal. El pragmatismu ta al alza y a él apela l'anunciu de la clínica susodicha. Los grandes líderes del momentu dan exemplu, distínguense por pragmáticos. Ehí tenemos a Mercedes Fernández, por poner un casu, que salva pragmáticamente los presupuestos de la FSA y nun ve nello razón ninguna pa pedir perdón, ¿a cuentu de qué? Galopando enriba esi corcel broncu, Pragmatismu, figúrasenos que Cherines va presentase na sede de la xunta local avilesina, qu'anda engarrada, a acabar coles disensiones por estinción masiva de la militancia (según procedimientu contrastáu de manera empírica en Xixón) a la manera d'aquel xinete qu'aterrorizaba Sleepy Hollow, seguro que s'acuerda usté: el que nun tenía cabeza. A Cherines, agora, va face-y falta usar con fuerza la mano izquierda, vaya por Dios, pa tirar de la rienda p'hacia l'oeste del cabu Peñes: Pragmatismu ta enseñáu a enfilar pa esi otru camín playu, onde algún palafreneru tien que lu almuace.

Ramón Pérez de Ayala, que con tantu amor pensó siempre n'Asturies, dexó dicho que l'asturianu ye "alguien que no se lo cree": un escépticu. Y l'escepticismu failu fatalista, y el fatalismu failu melancólicu. Ye un cuestibayu sentimental afayadizu y melgueru, muncho más prestosu d'andar que les pistes d'hormigón peles que gasta los cascos y pierde les ferraúres Pragmatismu. Pero hubo una época na que nun yera necesariamente asina, una época na que nun se pedía al gobernante nin al pretendiente que militasen a tiempu concretu nel bandu de l'acción o nel de l'abulia. Goya pintó a Jovellanos aprovechando un melancólicu descansu del so carácter pragmáticu. Nel cuadru, Minerva, la talla d'un castrón na mesa de madera noble y los papeles espardíos percima delaten al ilustráu dispuestu, entamador; la cabeza prerrománticamente melenuda vencida sobre la mano y los güeyos clisaos, al asturianu señardosu que recuerda esi momentu tan dolorosu como dulce de la derrota de cada escurecer nel valle. Dame la impresión de que, tresladáu al presente, don Gaspar, que nació'l día de los Reis Magos, nun-y diba regalar a doña Francisca Apolinaria, so madre, una mamografía: por delicadeza, o por respetu, o porque ye mandamientu de los díes festivos folgar del pragmatismu.

"El objetivo @PP_Asturias es ser un partido útil, cn el pragmatismo q exigen los tiempos,xa lograr una sociedad justa", tuiteó (tal cual) la pragmática Fernández esta selmana ente semeyes de brindes y deseos de prosperidá pal 2017. Nun hai melancolía asturiana. Tampoco se ve muncha ilustración nel testu. Definitivamente, nun ye Jovellanos.

Compartir el artículo

stats