Vaya: otru aplazamientu nel casu de José Ángel Fernández Villa. Esto de la xusticia ye llabor mui revesoso: vese que l'abogada del sindicalista (yo quito lo de "ex" porque l'actividá sindical, paezme a mi, ye un sacerdociu y los sacramentos son indelebles) anda buscándo-y les costures al casu y, pa que nun proteste que tán mal daes les puntaes, va ser l'Audiencia, en vez de la xueza, quien, prudentemente, remate'l pespunte.

Tanta estratexa dilatoria crea un ambiente, una tensión, un suspense que, a última hora, siempre deriven en decepción, siempre resulten frustrantes. Ún, educáu nel drama cinematográficu xudicial a la manera yanqui, gola por ver tantes espectatives sustanciaes nuna declaración final enllena de llágrimes, datos reveladores, nomes propios inesperaos y comprometíos y, siendo vulgares, mierda al ventilador que chisque Nalón arriba, Caudal abaxo y que cuche unos cuantos portales d'Uviéu. Pero sabemos que nun va ser asina. Puestos nel casu de que Villa acabe sentáu delantre una toga, ¿qué va revelar que nos asuste? Si ta bien de la cabeza, ya tendrá él cuidáu y cantará la Tarara; si mal, cantará la Tarara ensin cuidáu ningún. O igual canta "En el pozu María Luisa"?

Por esa previsibilidá del casu, confieso que'l personaxe que más m'interesa nesta película, al que sigo con más interés, ye a l'abogada de Villa: Ana García Boto. El probe conocimientu que tengo de la xusticia española (yera yo presidente de la comunidá y aquella vecina chiflada debía catorce meses) y, en particular, de la so anemia espresiva, tan distante del verbu floríu d'Atticus Finch en "Matar a un ruiseñor", enclíname más al despreciu qu'a otra cosa. Con García Boto, véome obligáu a rectificar, descubro que tamién hai quien sabe facer piruetes y cucurrabucos na xusticia española, anque seya fuera de la pista y del conu de lluz de los focos.

En 2015 retratóla Javier Cuervo nesti mesmu periódicu. Contaba que, siendo mocina, y con diferencia d'unos cuantos meses, leyere "El señor de los anillos" y "Ulises". Nun se puede ser más abogada: igual-y valen los nanos que los xigantes. (Nun descarto qu'esos mesmos títulos fueren los que sacaba Villa a tomar el frescu cuando usaba llibros como sustitutu del desodorante, nos sos años gloriosos.) Ateniéndonos a aquelles lectures iniciátiques, ¿en cuála de les dos categoríes encaxará García Boto al cliente actual: na del codiciosu de tesoros o na del consumidor de casquería? Recoyía Cuervo nel so artículu que, en licenciándose, García Boto albidró que l'exerciciu de l'abogacía diba presta-y muncho más que l'estudiu previu: "Ahora podría defender a los pobres y a los presos políticos." Grandes propósitos.

Cola ayuda de la Conseyería d'Educación y Cultura del Principáu d'Asturies