Justo Rodríguez Braga pasó nel cuartón la nueche del martes, una pieza más na operación de la UCO polos supuestos delitos de fraude y falsedá documental que llevaron a la Guardia Civil a restolar pela sede carbayona del sindicatu UGT. A la vuelta a la llibertá, Rodríguez Braga declaró a la prensa espectante que "da la sensación de que las órdenes vienen de muy arriba, la única explicación es que sea para tapar otras cosas como la "Gürtel"".
Coime. ¿Será verdá, ho? ¡Pasen coses tan rares?!
Pa salir de duldes, entré volao nes webs de la prensa estatal. Elpais.com abría colos pactos Gobiernu-PSOE pa regular un mecanismu de devolución de cláusules suelu. ¿Qué mas? Susana Díaz pierde votos n'Andalucía como agua un colador (vese que PRISA ya ta en campaña a favor del so candidatu vascu), dimiten decanos, el Yak-42, cai nieve a fargataes? Pero de lo de Justo Rodríguez Braga y la UGT asturiana, nada.
"Claro", pensé, "ye El País. A ver El Mundo, que-y tiren más los escándalos y dispara como un ciegu con fusil ametrallador." Elmundo.es: más sobre l'acuerdu PSOE-PP, más nevaes, el preciu de la lluz, Bárcenas y camioneros españoles atacaos en Francia. De lo nuestro, tampoco.
"ABC, qu'esos van col empresariu y resfreguen les manes coles desgracies sindicales." Abc.es: pactu cláusulas suelu PSOE-Gobiernu, ataques galos a los camioneros hispanos, preciu de la lluz, Bárcenas?
"¡Qué raro! Seguro que La Razón nun falla: eso ye derechona recalcitrante y tán a la que salta pela izquierda." Larazon.es: cláusules suelu otra vez, nevaes, terremotu italianu, agresiones franceses, conflictos en Podemos?
¡Coño! Pues paecía que, en Madrid, nun s'enterare naide de la mala nueche de Justo Rodríguez Braga nos calabozos nin de los apuros xudiciales del so sindicatu. Entós, miré The Times y The Guardian, porque igual el circu mediáticu-legal denunciáu por Justo Rodríguez Braga escedía l'Estáu español y entamárenlu fuerces europees pa interferir con Theresa May y les sos declaraciones sobre'l Brexit. Pero non, nun había señal del sindicalismu astur na prensa británica. Pasé a The New York Times y Washington Post, a ver si eses órdenes que suxería Rodríguez Braga veníen de mui, mui, pero mui arriba y cola intención foína d'apartar los focos de la xura presidencial de Donald Trump, pero tampoco atopé nada.
Paez que, como estratexa de despiste, la investigación de la UCO na sede sindical ovetense tenía poca carrera. Y ye que pa los medios de comunicación, por desgracia, les dimensiones de la noticia nun les da la cuantía del posible delitu sinon la talla del posible delincuente y, vistos dende Madrid (nun fai falta dir alluendi), la UGT y Justo Rodríguez Braga son menos que liliputienses: microscópicos. Nun dan sombra nin pa silenciar una imprevista flatulencia parlamentaria, muncho menos pa escurecer a Francisco Correa, el Bigotes, Bárcenas y el PP, toos xuntos. Inocente o culpable, JRB nun ta al so nivel, ellos xueguen notra liga. Por eso, cuando Rodríguez Braga se pon de punteres pa paecer xigante, la impresión que da ye xusto la contraria y a ún da-y por pensar que ye él el que quier usar los grandes escándalos nacionales como tapadera de la chamullería local.
Déxeme comenta-y una anécdota: una periodista que cubrió pa LA NUEVA ESPAÑA los rexistros de la Guardia Civil na sede de la UGT, Marián Martínez, cerró la so noticia con una nota humana: un sindicalista anónimu escondiérese de los uniformaos en báter, considerando que "aquí no van a encontrar nada". El testu tien una ambigüedá graciosa, porque nun sabemos si l'adverbiu "aquí" fai referencia a la sede en conxuntu o al serviciu onde él se guarda en concreto. Si ye'l segundu casu, yo nun pongo la mano en fueu. A fin de cuentes, Justo Rodríguez Braga dexó pa la posteridá aquelles grabaciones nes que declaraba, sobre les indemnizaciones que-y reclamaben, como secretariu xeneral de UGT Asturias que yera, empleaos del sindicatu afectaos por un ERE: "Son una mierda de dinero con la que yo me limpio el culo todos los días". Mal sitiu pa guardase de la UCO, el báter de la sede.
