La Nueva España

La Nueva España

Contenido exclusivo para suscriptores digitales

Esti Güevu Sal Quier

Chatarra

Sobre la granada de la Guerra Civil aparecida nes Regueres

Chatarra

Una granada de la Guerra Civil cayó pal suelu al iguar el teyáu d'una casa nes Regueres. Tiróla pal cielu un brazu allá per 1936. Va muncho qu'esi brazu ta muertu y con él les razones que lu llevaron al combate. Si, aquel día remotu, el perru de la casa lladró a los desconocíos cumpliendo con neutralidá la so obligación de guardián, ya cuantayá que calló. Si los páxaros cantaben nos árboles, indiferentes a los homes que s'arrastraben pela pación, cuantayá que cayeron de les cañes. Pero la granada aventada pel aire quedó en suspensu, ensin completar la so misión dañina, presa d'un paréntesis d'inmovilidá que duró ochenta y un años, o dormida, como'l paisanu qu'echó un pigazu de décades a la sombra d'un árbol. Agora, por fin, moviendo unos albañiles canalones y obra, la granada Rip van Winkle completó la elipse cuando ya tán ausentes los destinatarios de la so metralla. Será por eso que nun esplotó. Ún imaxina'l ruíu que sintieron los albañiles, el que fexo la bomba frustrada al tocar, por fin, suelu: un ruíu escuetu, impropiu, decepcionante si se quier: un ecu metálicu y ruinu de les esplosiones rotundes del 36, del coru destructor ente'l que subió pal cielu. Y vienme a la cabeza la escena final d'aquella película de Bresson, "Lancelot": depués de la batalla, esmorónase l'armadura del guerreru con un ramplón y desmitificador soníu a chatarra. Esi mesmu ye'l legáu que nos lega la Guerra Civil: chatarra.

miliorodriguezcueto.wordpress.com

Compartir el artículo

stats