Fernández Villa ye la nuestra infanta particular, la de los asturianos, digo. Paecía imposible velu (como paecía imposible vela a la otra) sentáu delantre una toga y, coime, llegó'l día. La familia (la gran familia socialista y del SOMA) tamién guarda distancies de manera aparente (acuérdese de qu'esti axetivu tien más d'un significáu). Los ciudadanos que resfreguen les manes empixaos cola humillación quieren pensar, na so inocencia ilusionada, que ye namás el primer retemblíu d'un terremotu purificador que tumbe otres torres vecines y cambie la sociedá de manera radical. Son too paralelismos porque, a fin de cuentes, ye historia vieya: la del pueblu agraviáu contra María Antonieta, contra Nerón.
Villa lléva-y ventaxa a María Antonieta nunca cosa: la defensa. Con Ana García Boto del so llau, nun tengo yo claro que la vilda de Lluis XVI perdiere la cabeza. Ún faise una idea de lo que pudo y pueda pasar dientro'l xuzgáu viendo lo que pasó fuera'l vienres. García Boto batalló valientemente contra la prensa acosadora apartándola del so cliente a la entrada y a la salida. A la entrada, avisó: "¡Bueno, ya estuvo bien! Voy a llamar a la policía, tenemos que entrar en el 'juzgao'. ¡Háganle 'tolas' fotos que quieran pero déjennos pasar!". Y, a la salida, subió'l nivel de l'amenaza envolviéndola nesi prestosu acentu carbayón ambivalente que ye tanto interrogación como esclamación: "¿Nos dejan salir o llamo a la Guardia Civil?". Nun quiero ofender a los funcionarios de la Policía pero paez que la Guardia Civil asusta más, o esa impresión saca ún viendo que l'abogada acude a la Benemérita cuando comprueba que la canalla prensil nun se disuelve, espantada, al sentir l'apelación al cuerpu Nacional.
Pero, ná, nin invocando al tricorniu: la sociedá ta endurecida.
-¿Nos dejan salir o llamo a la Guardia Civil? -ponse García Boto, arisca.
-Llama? -rétala una reportera xuvenil y faltona tuteándola con desvergüenza.
-¡Bueno? no? déjenos salir! ¡Porque están "libertando"? coartando la libertad de movimiento! -azótase García Boto, y nun m'estraña que pierda los nervios: la mocedá ya nun respeta les formes. Pero repónse volao-: ¡Me lío a dar mandobles "cola" cartera!, ¿eh?
Esta última amenaza a mi suéname a madre armada de zapatiella. Acierta García Boto, ye lo que pedíen la situación y l'antagonista. Pero supón el fracasu absolutu de les fuerces y cuerpos de seguridá del Estáu. L'abogada, finalmente, tien que fiar na propia esgrima pa espantar los moscones visto que los uniformes nun imponen ya'l respetu d'otros tiempos.
Non munchos años atrás, sobraben la Policía Nacional, la Benemérita y la cartera de García Boto: una guardia pretoriana prexubilada, fosca y sollerte, esconxuraba, namás cola so presencia, a los insolentes que s'acercaben al gran líder sindical ensin licencia. ¿Úlos agora, aquellos protectores? ¿Nun yera por amor la so custodia? ¿Tien que-y sacar filu al cantu la cartera una abogada indefensa y desesperada porque un piñu de paisanonos trabaos nun se quieren acordar del que-yos pagaba cacharros al acabar la misión del día? Una nueche de xunu de va cerca de dos mil años, previendo la desgracia de Nerón, los pretorianos de guardia desertaron de la residencia palatina na inconsciencia nocturna del emperador. Polo visto, tovía siguen corriendo cuesta abaxo.
miliorodriguezcueto.wordpress.com
