Una destacada parlamentaria conservadora asturiana fue víctima, el martes pasáu, d'una agresión verbal: sélo de fonte fidedigna, por oreya presente. Andando per Uviéu, la parlamentaria cruzóse con un rapaz que la llamó gocha. Ábrense incógnites, apetez espicular.
L'agresor, ¿sería un militante del sector contrariu nel delicáu procesu de primaries que vive'l PP? Nun lo paez. En boca de los militantes del PP pueden esperase espresiones indignaes y hasta violentes, por qué non, pero nunca paletes. Quiero decir que, si'l casu fuere esi (el de la confrontación intestina), la parlamentaria asturiana pudo oír "cerda, puerca, guarra, cochina, marrana, gorrina" o cualquier otru sinónimu de los munchos qu'ofrez la rica llingua de Cervantes y de Corín Tellado pero nunca un vulgar aldeanismu astur: gocha.
¿Sería una agresión de xéneru? ¿Un atentáu aleatoriu, nihilista? ¿Pon altu'l listón hixénicu esi desconocíu impertinente? Non: hai que se rendir a la evidencia. Tuvo que se tratar, según categoría del tamién parlamentariu David González Medina, d'un radical de los de la llingua, que tán enfadaos porque'l PP opónse a qu'un garapiellu d'alumnos de primaria reciba clases d'Educación Física, Plástica y Sociales n'asturianu, nin siquiera, sorprendentemente, col consentimientu paternu (digo sorprendentemente porque ye difícil calcular cuántes veces se defendió, dende los escaños y los micrófonos conservadores, el derechu de les families a decidir con llibertá la educación de los fíos).
Claro: si, según paez defender González Medina, el sitiu de la llingua asturiana nun ta nos centros educativos nin el so destín ye tratar de Filosofía, Historia, Literatura o Bioloxía, y menos tovía de política (esto último con minúscula inicial, que nin ye arte nin ciencia), ¿cómo podemos esperar que naide la use pa dedicanos un poema, p'argumentar dialécticamente o debatir un proyectu de llei?; y, en cambiu, si lo procedente (por una voluntá nunca espresada de los asturianos pero que González Medina, Mercedes Fernández y otros escaparatibles del Partíu Popular dicen conocer de manera infusa) ye que se limite a ser idioma nativu d'escures corripes incomunicaes hasta que-y llegue'l día del samartín lingüísticu, ¿estráñanos que l'apelativu que nos dediquen seya gocha? Nesi contestu, puede entendese hasta como cariñosu.
