Les madres de dos neños de los de mocu pingón pegáronse na banda de la pista de futbito onde los fíos, uniformaos de rivales, xugaben un partíu de categoría mandilona. Esta vez pasó en Xixón y los deportistes teníen ente cinco y seis años. Les madres, alredor de 200.000: la edá cavernícola. Una díxo-y nun se sabe qué al fíu de la otra y armóse la marimorena. Engancháronse elles, acudieron los respectivos colores n'apoyu: la engarrada xeneralizóse. Imaxine usté a los futbolistes tresformaos n'espectadores. Izan, defensa rocosu, paráu y de calcetu cayíu, mineru nasal, contempla la estampa bélica ensin acabar d'entendela? pero aprendiendo. Richi, delanteru estrella del equipu visitante, llora al ver a so ma pel suelu enseñando la culera de los pantis rotos y cabalgada por una tigresa d'uñes de sable rabiosa. Llegaron los municipales y interpunxéronse ente les partes. Y partes de lesiones hubo, la prensa nun dexó constancia de cuántos. Goles, nueve: 7 - 2 ganaron los locales. Nun se sabe si en materia de palos tamién.
¡Qué gran deporte, el fútbol! ¿Cómo s'arreglaba la humanidá anterior a la FIFA pa regular frustraciones, tares y carencies educatives ensin una llosona rectangular onde-yos dar suelta? Nun me discuta, por favor, que la función última del fútbol ye catártica anque d'una manera un plizcu distinta a la griega, eso sí. Aristóteles (ruégo-y que me perdone por xuntar "Aristóteles" y "fútbol" nel mesmu testu) dixo aquello de la purificación emocional, espiritual y mental, y eso pasa nes grades de cualquier estadiu balompédicu y, polo visto, tamién na cancha polideportiva de la escuela del barriu. Diferencia: la catarsis de la traxedia griega nacía de la compasión, esta neocatarsis futbolera ye bastarda del odiu.
Al revés que nos teatros de l'antigüedá, l'espectáculu de los campos de fútbol ta nes grades: los realizadores televisivos son conscientes d'ello: vémoslos diariamente y munches tardes más d'una vez. Una retransmisión d'un partíu qu'ignorare'l balón y les carreres pel verde, que mostrare noventa minutos integrales de grades combinando sabiamente planos xenerales y primeros de forofaes rivales colos comentarios "radiofónicos" de los locutores podía trunfar: seguro que trunfaba. Porque, ¿cuántes veces nun s'aburre l'aficionáu nun encuentru plumbeu, afolgazanáu, cagón, improductivu? Nestos casos, otra vez, el protagonismu tienlu l'irrespetable abucheón que canta insultos y pide cabeces.
Insisto: estes situaciones son evitables. Pienso en "las luchas" de Méjico. "Rudos" y "técnicos" acuerden un combate con tongo, tol mundu lo sabe pero da lo mesmo: l'arena llénase y el públicu ruxe. Considere usté qué gran ventaxa supondría pal fútbol una intelixente teatralización de resultaos, faltes, arbitraxes corruptos, etc. Total, ¿qué más da? Pa pegase val igualmente. Esperances de prosperidá pal fíu ignaru incapaz d'aprender la tabla del cuatro diba ofreceles igual. Los xugadores vendíos podíen seguir anunciando crema de manos pa pieles sensibles. Los alcaldes y presidentes autonómicos, si reciben a los Reis Magos, ¿qué problema diben tener en da-y la mano a un trunfante White Demon del Real Madrid o al Cavernari Estelat del Barça? Les funciones sociales y económiques del fútbol, que son lo que cuenta, quedaben salvaes cola garantía, amás, d'esconxurar l'aburrimientu y potenciar estudiadamente, mediando bon equipu de guionistes de Liga o Copa, la esaltación, la pasión colectiva, el localismu patrióticu y, en pasando l'arrebatu, la feliz flacidez del post coitum. ¿Que diba ser una mentira, un montaxe, una falsedá? Bueno: como tolo demás.
