Estos díes el fou tiennos atemorizaos. Estremecémonos cuando nos ponemos na piel de los que nun pudieron, nin puen escapar de les llames en Portugal, en Londres y en tantos otros puntos que sufren les quemes nos meses de branu. Ayeri les fogueres na nueche de San Xuan traxéronnos a la cabeza'l fou que ta abrasando tantos llugares.

Sicasí, el fou cobró protagonismu na nueche máxica, porque la vida sigue. Nesta nueche, el resplandor alimenta les ansies de lluz, y el fou tien un significáu purificador. El fou y l'agua, dos elementos pa celebrar el solsticiu del branu. Quemamos los trapos vieyos y tolo que nos sobra por casa. Disfrutamos quemando los sinsabores y tristures que nos enfríen pol añu'l corazón. Y pidimos con enfotu deseos de salú, suerte, amor y otres bondaes.

Les flores son otru elementu que nun falta a la cita. Con flores enramamos les fontes. Una costume que vien de mui antiguu, que tien llugar en munches cultures y que tien munchu puxu n'Asturies.

Nesta nueche máxica sentimos la presencia de les xanes, que salen a garrar la flor del agua pa poder disfrutar otru añu más del encantamientu. Sentimos la presencia del cuélebre y el basiliscu, la guaxa y les bruxes. Tamién ente nós tán el sumiciu, el papón, el pataricu, l'home l'untu y el trasgu, dedicáu esti, como siempre, a facer de les suyes mientres nosotros disfrutábemos de la nueche. Sicasí toos ellos inofensivos, magar dalgunos nun seyan tan bonos, según nos cuenten les lleendes.Y asina, dempués de cumplir col ritual, dormirán nel imaxinariu de toos nós, mientres andamos otru añu nel qu'ocurrirán munches coses, bones y males.

Anduvi perhí caleyando, sintiéndome xana por una nueche. Nun vi mozos que llevaren ramos, nin vi ramos en terraces, nin en balcones. Paez ser que les flores del amor qu'adornaben puertes y ventanes antaño yá nun tienen sentíu dende hai unes décades. Agora hai otres oportunidaes y nun faen falta estos rituales, porque la mocedá tien miles d'ocasiones pa pidir y demostrar amor, o lo que seya.

Con un ramu de flores enllenes de rosada'l mozu engalanaba les ventanes de les moces como seña d'amor. Un ramu de flores na puerta casa o colgaes nes puertes y balcones, que la moza entendía como niciu de pidimientu de rellación. Munchos mozos a lo llargo'l tiempu quedaron atrapaos pa siempre nos brazos d'aquel ramu, que nun s'amostiaba col pasar de los díes, anque, de xemes en cuando, se pincharen entrambos namoraos con dalguna qu'otra espina, porque siempre se cumple'l refrán: "Nun hai rosa ensin espines".

Güei, ensin ramos nin flores, l'amor ta por veces mancáu por espines, a veces envelenaes.