Depués de dos años suspendíos pola crisis sanitaria, los Trenes Turísticos d'Asturies vuelven circular el sábadu 16 de xunetu, cuando va celebrase la primer salida de la Ruta de los Puertos y Cantiles de la estación de Xixón.

Nesta ocasión, son dos los itinerarios d'un día diseñaos pa ufiertar la perspectiva única y la esperiencia singular del viaxe nun tren d'Anchu Métricu, según informó Renfe en nota de prensa.

Les rutes tienen como orixe y destín les estaciones d'Uviéu y Xixón y, a lo llargo de la xornada, introduzse nos requexos y paisaxes más interesantes y espectaculares del Occidente y l'interior d'Asturies. El percorríu en tren acompáñase col serviciu d'autobús y guía. Van realizase trés salíes de cada ruta con cuasi 100 places disponibles en cada salida.

El Tren de la Ruta de Los Puertos y Cantiles tien salíes programaes los sábados 16 y 30 de xunetu y 20 d'agostu. El viaxe principia na estación de Xixón a les 08:56 hores y acaba na mesma a les 21:54 hores. Visítense los cantiles del Cabu Vidiu, Cuideiru, el Cabu Peñes y el so Centru d'Interpretación del Mediu Marín y la villa marinera de Candás.

El tren de la Ruta de La sidra y los dinosaurios tien salíes programaes los sábados 23 de xunetu y 20 y 27 d'agostu. El viaxe principia na estación d'Uviéu a les 08.40 hores y acaba na mesma a les 22.00 hores. Visítense les instalaciones rellacionaes cola cultura sidrera en Villaviciosa y Nava, el Muséu del Xurásicu d'Asturies (MUJA), Colunga y el Mirador del Fitu.