Blog 
Filazón
RSS - Blog de MªEsther  García López

Archivo

  • 05
    Abril
    2013

    Comenta

    Comparte

    Twitea

    Aguóse la fiesta

     L'agua foi prtotagonista d'estes fiestes y pillamos bones pingadures.

    Sóbrame dicir lo que cuerre'l tiempu. Hai veces que quixéremos detenelo, pero ye quien más se burlla de nosotros. Yá tamos n'abril, mes primaveral, de díes llargos, inda más llargos agora que yá cambió la hora y tenemos qu'adautanos a madrugar un poco más p'aprovechar la lluz natural.

    Diz un refrán que «n'abril agües mil». Esperemos que dempués de tantu aguaceru d'esta Selmana Santa, el Ñuberu de compadeza de nosotros y nun ximielgue les nubes nuna bona temporada. Tuviemos una Selmana Santa aguada, moyáronse los santos, les carroces, la Comida na Calle? En fin, ye como si l'agua quixera bañanos a toos y llimpianos de tola gafura que tamos viviendo pa ver si d'una vez encomenzamos a alitar. Difícil, porque los que teníen que llavase de les culpes, nun sé si pasaríen pol confesionariu como ye davezu en Pascua.

    Pero sí pasaron, de xuru que nun s'arrepienten de nada nin van devolvenos tolo que nos arrobaron. Ellos, tienen un bon impermeable pal «agua y el temporal». Impermeable de los qu'aguanta'l mayor bastiazu, y van enchipaos rezando tres del santu que tolo perdona, pidiendo-y que los ayude a robar más. Da-yos lo mesmo que llueva o que truene, nesta sociedá sedienta de xusticia na que toos nos entrugamos hasta onde vamos llegar. Ellos, los lladruepos de guante blancu, siempre tán atechaos y protexíos.

    Sicasí pa toos pasa'l tiempu y un mundu meyor ye posible. Tenemos que siguir lluchando por consiguilo. N'Avilés vivimos estes fiestes con prestancia, plantámos-y cara al temporal y disfrutamos del Bollu tolo que pudimos. L'humor y la creatividá tuvieron presentes y asina, con allegría y bon rollu, pasó la fiesta ¡un añu más! La fiesta ye un ritu de pasu que siguimos esperando cada añu y que marca un antes y un dempués. Un añu que nos paez curtiu, porque pasa nun tris, pero que si facemos balance tenemos abondo que contar de toles coses bones y males que nos pasaron.

    El domingu de Pascua rellumó'l Sol. Seña de que nunca llovió que nun abocanara. Disfrutamos de la música, de los símbolos, del dulzor del bollu y del sabor tradicional de la folixa avilesina. Disfrutamos porque tenemos drechu a l'allegría, a la esperanza y al optimismu. Endulzar la vida ye mui importante. Ye la manera de que les endorfines cuerran pel sangre. Acabo con esti sonetu dulce qu'hai unos años-y dediqué al bollu avilesín.

    Bollu

    Airosos, elegantes y esponxosos / espiertan el sentíu gustativu.

    Y na fiesta, acompañaos del vinu, / saboriamos momentos mui sabrosos.

    El so color intensu, amarillentu? / revisti Avilés de galanura.

    Como si fueran flores na mestura, / esparde'l so golor, perfuma'l vientu.

    Dichosos los paladares endulzaos / que saborien esta pieza maxistral.

    Arumes d'almíbare, escarchaos. / Quién pudiera barnizar col so dulzor/ tolos díes del añu avilesín?

    ¡Quién pudiera saboriar el so sabor!
     

     

    Compartir en Twitter
    Compartir en Facebook