Blog 
Filazón
RSS - Blog de MªEsther  García López

Archivo

  • 04
    Marzo
    2012

    Comenta

    Comparte

    Twitea

    tarot

    Añu bisaiestu, añu siniestru

    Esti añu 2012, más llargu por ser bisiestu, allárgase inda más pola mor de les calamidaes sociales y económiques.

    La tierra tarda 365 díes y un cuartu en da-y la vuelta al Sol. P'adautar esti desfase de seis hores, cada cuatro años tenemos un añu de 366 díes, un día más pal mes más curtiu, que ye febreru, que pasa a tener 29 díes. Foi nel añu ¿45-46? antes de Cristo, cuando Julio César aprobó'l «Calendariu Juliano» amestando un día más cada cuatro años al calendariu. El día a intercalar yera'l sestu enantes de les calendes de marzu, el 22 de febreru. Y nel sieglu XVI, el Papa Gregorio XIII promulgó l'usu del «Calendariu Gregoriano» a traviés de la bula Inter Gravissimas qu'aportó dellos cambios al anterior. El cambiu más importante ye que son bisiestos los años que seyan divisibles por cuatro, a esceición de los años seculares, que namás son bisiestos si son divisibles por 400. Asina, l'añu 1900 nun foi añu bisiestu, pero sí lo foi l'añu 2000.
     
    L'añu bisiestu nun dexa de ser singular y d'abellugar delles creencies populares, más bien males. Un añu singular, pues los nacíos el 29 de febreru namás puen celebrar el cumpleaños cada cuatro años. Diríemos que son siempre xóvenes. Casi toi segura, que dalgunos pas, hasta fai unes décades, igual se miraben p'asentar a los neños nacíos nun día tan especial y corríen la fecha pa que cumplieran los años como los demás.
     
    L'ello ye qu'estos años bisiestos nun tienen bon aquel. Y esti añu 2012 nun se presenta nada esperanzador. Tamos rodiaos de calamidaes: crisis, el paru qu'aumenta y emprobez cada día a más xente y Asturies en desgobiernu dafechu dende'l 20 de mayu de 2011.Y como falla la cabeza, convóquense otres eleiciones pa espilfarrar más perres. La seca qu'amaga con acabanos col verdor de los praos y col poco verdor d'espíritu que nos queda. Cada día tamos más amusgaos ante la situación social que nos castiga. Recortes y más recortes y xubida d'impuestos pa los más probes. Nesti añu bisiestu pue dicise que se cumple'l dichu: añu bisiestu añu siniestru.
     
    Según los mayas nel presente 2012 va acabase'l mundu. Pienso que lo que se nos ta acabando ye la paciencia ante esta situación de desastre políticu que nun sabemos onde nos va llevar. Nel añu 1960, la mio maestra rezaba con nosotros pa que tuviéremos preparaes porque s'acercaba'l fin del mundu. Tábemos toes muertines de mieu y mirando cuando'l cielu se ponía roxu (señal de que'l fin taba cerca). Pasó l'añu 60 y yá pasanon ¡unos cuantos años más! Diz la canción que «la vida sigue igual», pero la vida ta cada vez peor. Güei, nun nos esmolez la profecía del fin del mundu. Lo que nos esmolez ye qu'esti añu bisiestu va ser duru y llargu. Amás d'allargase por ser bisiestu, allárgase pola mor de les calamidaes económiques y sociales que nos tán afeutando.

     

     

    Compartir en Twitter
    Compartir en Facebook