Blog 
Filazón
RSS - Blog de esther_garca

El autor

Blog Filazón - esther_garca

esther_garca


Archivo

  • 29
    Junio
    2013

    Comenta

    Comparte

    Twitea

    botellón p'arder per dientro


    Per San Xuan, amás de les fogueres tradicionales, el fueu del alcohol quema'l gorgüelu.


     Llegó, adulces, el branu. Esti añu toos lu esperamos con impaciencia, porque l'iviernu foi allargándose y tuvimos agua ya fríu hasta fai dos díes. Nun se cumplió'l refrán "hasta'l cuarenta de mayu nun te quites el sayu" porque yá tamos llegando al 60 de mayu y el nordés ta obligándonos a siguir abrigaos.

     

    Menos mal que'l tiempu nos dexó disfrutar de la nueche San Xuan. Guapa nueche presidida pola Lluna. Una Lluna pergrande, enllena d'ilusiones, como nós. Una Lluna que disfruta por presidir esta nueche máxica, y présta-y compartila con xanes y bruxes, trasgos y diaños y otros seres. Anque los diaños anden sueltos tolos díes y atizando en tolos xareos. ¡Diaños más bien de carne y güesu!

     

    El calor del fueu, la Lluna enllena, les riaes de xente alredor de la foguera, la danza, los culinos de sidra? llamen a suañar y a disfrutar y a que añu tres añu nun perdamos la ilusión de tropezar na fiesta con una guapa xana. Prúyenos saber cómo se presentarán les xanes nestos tiempos que cuerren pa encantar a los mozos. Quiciabes se presenten enllenes de pendientes d'oru y con tatuaxes platiaos per tol cuerpu. Los diaños y les bruxes de xuru que rondarán poles concentraciones de botellón onde la maxa de la nueche s'alimenta con munchu alcohol, y xugarán a lo que-yos dea pola gana nesi ambiente pa ellos bien afayadizu.

     

    Yo anduvi caleyando de foguera en foguera, pensando en cuál me prestaría más echar el papelín col mio meyor deséu. Al final, determiné quemalu na d'Arnáu, pues yera una foguerona onde había un bon borrayu que debió tar ardiendo hasta'l día siguiente.

     

    Tuvi tamién en Salinas, nun vi nenguna foguera, quiciabes porque inda nun dieren les doce. Lo que más me llamó l'atención, foi qu'en vez de lleña p'alimentar el fueu, los mozos y moces llevaben bolsaes de botelles d'alcohol, p'arder per dientro. Botellón na playa. ¡Ai que ver lo que cambien les tradiciones! Los que van al día siguiente, pa disfrutar del bañu, ya podéis maxinar lo qu'atopen. Por muncho que pasaren llimpiando, queden cristales semaos pel sable, difíciles de recoyer, col peligru qu'eso supón pa los bañistes.

     

      Ye mui triste que nun seyamos quien a educar a los xóvenes pa que dexen los llugares de folixa llimpios y en condiciones pa poder volver. (dexando aparte otres tristures del botellón de les que güei nun me voi ocupar). Qué diríen toos estos, si quixeren volver al mesmu sitiu y lu alcontraren tal cual lo dexaron, enllenu de porquería, bolses de plásticu, botelles, vasos y cristales rotos, amás d'otres coses. Nun sé si sabrán que daquién tien que dir detrás llimpiando lo qu'ellos empuerquen, y pa que, ensin miramientu, lo vuelvan a dexar soyáu de basura cuando vuelvan a concentrase alredor del botellón.
        


     

     

     

    Compartir en Twitter
    Compartir en Facebook