Blog 
Filazón
RSS - Blog de MªEsther  García López

Archivo

  • 06
    Mayo
    2016

    Comenta

    Comparte

    Twitea

    Oviedo asturias

    Cavilacionesalredor de los llibros

    Cavilaciones alredor de los llibros

    La llectura espierta en nosotros distintes sensaciones

    24.04.2016 | 05:01

    Cavilacionesalredor de los llibros
    Cavilaciones alredor de los llibros

    M.ª Esther García López Esti mes d'abril, nel que tolos años rendimos homenaxe al llibru y a los grandes de la Lliteratura, da pa muncho que cavilar. Llibros, escritores, llibreríes, recitales, charles?Cavilamos sobre les llectures que nos ocupen, sobre les publicaciones, concursos, premios y sobre tolo que xira alredor del llibru y de les sos páxines.

    Nestos díes diome por pensar por qué llibros de tolos que tengo siento más apreciu. Vaya tontada. Nun fui quien a dame una respuesta. Tamién pensé nos llibros que tán na estantería un poco escaecíos, y refiérome sobre too a los qu'hai unos años yeren llibros de consulta, enciclopedies, diccionarios y agora, si nun ye pa un trabayu pal que se tenga que consultar bibliografía específica, arreglámonos caleyando pola rede. Sin embargu otros llibros tán manosiaos y remiraos, mimaos, lleíos y relleíos. Podríemos dicir que son llibros amigos que nos acompañen en distintes ocasiones. Y que van con nosotros pa la cama, pa la playa, de viaxe.

    Tamién pensé nunos llibros qu'heredé y que tán ehí nuna caxa esperando restauración. Son llibros vieyos, nos que dalgún guxán yá fixera la casa nes sos páxines. Cuando los abro entrame señardá al pensar en quién los lleó, los estudió, los consultó. Anque tienen unos cientos d'años, tán cargaos d'afeutividá. Los sos propietarios morrieron cuantayá y, de dalguna manera, nes fueyes de los llibros (como n'otres pertenencies) tán imprimíes les sos buelgues.

    Dempués tuvi cavilando sobre los llibros que tengo dedicaos polos sos autores. Qué guapo. Y entrúgome por qué tendrá esti fechu tala importancia. Ye como si la firma del autor inmortalizare la so figura. Como si l'autor nos diera un cachín de si mesmu.

    Y, ¡el golor! Cada llibru tien un arume especial, a papel, a tinta, a nuevo o a vieyo. Pa los llibros tamién pasa'l tiempu. Nun hai dulda, pero casi siempre sobreviven al propietariu. Qué pasará nel futuru con tantos y tantos llibros que güei enllenen les biblioteques particulares. Ónde dirán a parar. Los pisos son cada vez más pequeños y hai otres circunstancies que de xuru se tornarán en dificultaes pa guardar esa herencia lliteraria que dexaremos los que nos dio por meter en casa tantos y tantos "amigos-llibros".

    Cuántes sensaciones espierta un llibru. Sin embargu, miro pal e-book qu'hai unos años me traxo Papi Noel y tengo ellí tamién otra biblioteca, bien distinta. Nin güel a nada, nin los guxanos van poder aniar nes sos páxines o requexos. Eso sí, nun pesa nin toma sitiu y pues llevala contigo a toles partes.

    Sicasí, los llibros en papel convivirán col e-book. La maxa de pasar les fueyes, de volver p'atrás, de sentir l'arume a papel, o dormir col llibru debaxo l'almuhada, fai qu'esto llibros seyan dalgo distintu que nun se pue consiguir colos que tenemos na biblioteca del e-book.

     

    Compartir en Twitter
    Compartir en Facebook