Blog 
Filazón
RSS - Blog de MªEsther  García López

Archivo

  • 26
    Mayo
    2012

    Comenta

    Comparte

    Twitea

    Alicante

    Contaminación blanca

    Los supermercaos apuesten por eliminar les bolses de plásticu d'usar y tirar.

    Faise novedá tener que volver a llevar la bolsa de tela o'l carru pa dir a mercar. Dende hai unos meses, la mayoría de los supermercaos yá nun nos regalen les bolses de plásticu. Si nun llevamos onde meter los enredos que compramos, tenemos que pagar unos céntimos por cada bolsa qu'utilicemos. Ye ésta una perbona midida ecolóxica, anque tenga tamién una motivación económica. Sobre too, los grandes supermercaos aforren asina una pila perres, pues toos sabemos que cuando nos regalen una cosa abusamos d'ello, y naide pue negar que llevábemos a casa munches bolses innecesaries. Al ser gratis, naide piensa nel aforru. Somos espilfarradores por naturaleza.

    Sicasí les empreses fabricantes de bolses nun tán d'alcuerdu con esta midida ecolóxica porque tán viendo que se-yos va caer la venta. Enxamás llueve a gusto de toos. Esti gran movimientu de bolses de plásticu yera un bon negociu pa los fabricantes, y por eso nun-yos presta un res les campañes medioambientales que puedan influir nos hábitos de la xente y mermar asina l'usu d'estos productos, anque seyan conscientes de que son altamente contaminantes.

    Ta visto que somos animales de costumes. Magar el plásticu foi inventáu hai más d'un sieglu, nun se xeneralizó'l so usu hasta más o menos mediaos del sieglu XX. Pa dalgunos que vivíemos nos pueblos, onde too llega más tarde, foi una novedá incorporar el plásticu al llar. Envoltorios, envases, recipientes, bolses, electrodomésticos, medios de tresporte, frascos y otros munchos oxetos fueron ocupando'l llugar del papel, del cartón, de la madera, del metal y d'otros materiales más perecederos.

    Les bolses de plásticu tarden munchos cientos d'años en desaniciase. Y nesi llargu períodu de descomposición van lliberando sustancies contaminantes. Según los espertos en temes de mediu ambiente, inda falta muncho por saber sobre los efeutos que tien sobre'l mediu y sobre la salú la nomada «contaminación blanca», pero sábese que les sustancies peligroses que van soltando ya entraron na cadena allimentaria, sobre too, porque los pexes comen estes partícules de plásticu, confundiéndoles con manxares marinos. Ye mui preocupante cuando nel campu, na playa y otros llugares públicos onde la xente va a disfrutar de la naturaleza queden davezu bolses y recipientes soyando'l suelu ensin pensar a ónde van parar. Ye pa tener en cuenta que la nomada «isla del plástico», asitiada nel Pacíficu Norte, formóse de los millones de tonelaes d'esperdicios que lleguen al mar y que pola mor de les corrientes marines fueron amontonándose nesti llugar del océanu. Investigadores d'esti basureru califíquenlu como ún de los mayores desastres ecolóxicos del que toos somos un poco responsables.

    Poro, si nos arreglamos ensin usar tantu plásticu y por otra parte s'apuesta pol reciclaxe, contribuiremos un migayín a baxar los niveles de contaminación del planeta
     

     

    Compartir en Twitter
    Compartir en Facebook