Blog 
Filazón
RSS - Blog de MªEsther  García López

Archivo

  • 17
    Febrero
    2012

    Comenta

    Comparte

    Twitea

    Alicante

    De Comadres

     

    La fiesta de Comadres, una celebración reivindicativa.

    Mientres escribo esti artículu siento bulla na calle, xaréu de muyeres que pasian, van y vienen y busquen el llugar p'axuntase. Güei ye «día de comadres». Comadres, de comadréu, comadreando peles calles de villes y ciudaes d'Asturies. Les muyeres, a parte del espíritu festivu d'esta celebración, reivindiquen, una vez más, el llugar que-yos correspuende na nuesa soiedá.

    Esta fiesta de muyeres tien el so orixe n'antigüedá, quiciabes na fiesta de les Matronalia que los romanos celebraben n'honor de Juno Lucina, diosa de la lluz (S.III a.C.). Por un día, nuna sociedá patriarcal como la romana, los homes delegaban el mandu nes sos esposes y éstes nes sos sirvientes. Nun se sabe lo que fairíen ellos mentanto. Güei sí sabemos qu'ellos también compadreen y en dellos sitios yá celebren la fiesta de los compadres. Nun se resignen a quedase en casa nin siquiera por un día?

    D'otra miente, la palabra comadre fai alusión a la rellación de parentescu espiritual ente la madrina y los padres o'l padrín del bautizáu. Otros estudios d'esta tradición busquen el so orixe nes celestines o comadres. Muyeres contaperes o alcagüetes, presentes na Lliteratura medieval. Pero, les muyeres sabemos facer otres munches coses más que bilordiar y exercer de casamenteres. Güei tamos nel camín d'escoyer el nuestru propiu destín. Les tradiciones van evolucionando, y dempués de pasar por époques de más o menos puxu, estos años revívese la fiesta les comadres como una fiesta reivindicativa, onde les muyeres disfrutamos de la llibertá por unes hores. Una manifestación más de la llucha pola igualdá de drechos. Una fiesta na que nun hai diferencia xeneracional, porque comadreen güeles y nietes, madres y fíes, toes xuntes.

    De cualquier manera, ta bien conservar les tradiciones, siempre dexando qu'evolucionen al empar del tiempu nel que vivimos. Sicasí, a veces, el conteníu que se-yos da nun ye'l más afayadizu. Dende ahí unos años, dalgunos homes exhiben los sos cuerpos pa divertir a les muyeres el día les comadres. Los «boys» caleyen nesti día d'un llau pa otru, de restaurante en restaurante, pa sacar unes perruques faciendo dellos esparabanes nes pistes de los establecimientos de comadréu.

    Gritos de risa y voces un poco histériques, mezclaes cola maxa del desnudu, animen a estos mozos a pasiase pol escenariu de la fiesta ante la mirada femenina, dempués d'ensayar un «striptis» ¿estéticu? pa divertir a les muyeres . Diz el cantar «pa calentar les muyeres yá nun fai falta carbón, caliéntense elles soles viendo xugar al balón». Nun sé si esti «striptis» ye pa calentar o a veces pa deprimir. Esto ye un fenómenu a analizar. Seique nun tien muncho que ver col espíritu d'esta fiesta, pero l'ello ye que se foi imponiendo nos últimos años y los «boys» pasaron en munchos sitios a formar parte d'esta celebración nomada matriarcal.

    Deséovos que pasareis bona nueche de comadréu. En tiempos de crisis nun ta mal divertise y evadise por unes hores de los problemes.

     

     

     

    Compartir en Twitter
    Compartir en Facebook