Blog 
Filazón
RSS - Blog de MªEsther  García López

Archivo

  • 21
    Mayo
    2015

    Comenta

    Comparte

    Twitea

    Oviedo asturias

    De llibros ya bibliotecas

    De l.libros ya bibliotecas

    Esbilla del discursu pola distinción "Amiga de la Biblioteca de L.luarca" del Ayuntamientu de Valdés
     08.04.2015 | 09:23


     
    Dizse qu'ente las bonas amistades siempre tien qu'haber un bilbiotecariu ou bilbiotecaria ya una biblioteca.

    El pasáu día 1 d'abril recibí, xunto a la científica María Berdasco, la distinción "Amiga de la Biblioteca de L.luarca", gallardón que tien instituyío l'Ayuntamientu de Valdés a traviés de la Conceyalía de Cultura, presidida n'actualidá por Gumersindo Cuervo. Esti reconocimientu concédese dende hai dos años, na estaya de las l.letras ya de las ciencias. L'añu pasáu recibiéronlu la escritora Ángeles Caso ya'l científicu Carlos López Otín.

    Esbillo una parte del mio discursu, pa que se pueda lleer nestas páxinas.

    "Dicía Jorge Luis Borges, 'Siempres imaxiné que'l Paraísu sería dalgún tipu de biblioteca'.

    Esti gallardón, "Amiga de la Biblioteca de L.luarca", ya pa mi mui importante. Amiga ya en sí una pallabra guapa. La pallabra amigu, amiga, tien unas connotaciones especiales. Amás porque esta distinción dánmela en casa, no conceyu onde tengo raíces mui apegadas a la tierra. Ya nun me cabe más honor.

    Ya mui grande que te nomen amiga d'una entidá onde ta guardada tanta sabiduría. Na Biblioteca de L.luarca munchos de los mios llibros tienen sitiu dende cuantayá. Sei que tán a bon recáu. Ya espero que seyan l.leíos ya saboriaos por muitas personas. "Un l.libru nuna biblioteca, ya un l.libru feliz" afirma una escritora alemana. You amiesto, ya más feliz cuanto más personas lu l.lean.

    Pa qu'haya l.libros tien qu'haber escritores, investigadores, científicos, ensayistas, periodistas, poetas, personas que con creatividá, con imaxinación, col sou trabayu, faen posible que la sabiduría seya compartida ya asina dir arriqueciendo'l corpus del conocimientu ya'l corpus l.literariu de la Humanidá.

    Faen posible que dalgo bello puea tar al alcance de tolas personas que quieran disfrutalo.

    Aprópiome d'estas pallabras de Federico García Lorca:

    "Non solo de pan vive l'home. You, si tuviera fame ya tuviera probe na calle nun pidiría un pan; sinón que pidiría mediu pan ya un llibru. Ya you ataco dende aquí a los que solamente falan de reivindicaciones económicas ensin nomar enxamás las reivindicaciones culturales, que ya lo que los pueblos piden a gritos. Bien ta que tolos homes coman, pero tamién que tolos homes sepan (?)".

    Pallabras que tán güei d'actualidá, cuando tamos sufriendo una fonda crisis económica ya hai probeza na nuesa sociedá. Somos conscientes de qu'esta situación ya lo primeiro que tenemos que solucionar. Pero la crisis azota enforma a la cultura. Ya nun podemos escaecer qu'hai muitas personas viviendo alredor de la cultura. La cultura ya sobre too un bien social pero tamién ya un bien económicu qu'aporta un 7% del PIB. Una sociedá que nun ta alimentada pola cultura ya una sociedá embrutecida, sin espíritu críticu, ya una sociedá muerta. Ya l'accesu a la cultura pasa pola l.lectura, pol estudiu ya'l trabayu.

    Las bibliotecas son dalgo más qu'un almacén de l.libros. Aparte de que podamos disfrutar d'outros soportes: CDs, películas ya agora hasta l.libros electrónicos, nel.las reina'l silenciu, treslladámonos a outros mundos, a outras culturas, viaxamos, sufrimos, divertímonos, ya identificámonos colos personaxes qu'habitan nos miles de páxinas que nutren tantos ya tantos llibros. La bilbioteca ya un l.lugar pa soñar. Un l.lugar d'interaición.Un l.lugar de l.libertá. "Lee y conducirás, no leas y serás conducido".afirmaba Santa Teresa de Jesús.

    Cuando l'escritor rusu Dostoyevsky taba prisioneru en Siberia, allonxáu del mundu, ya sufriendo las calamidades ya'l dolor, la fame ya la frialdá, dicía-ys a los familiares; "mandáime l.libros, l.libros, muitos l.libros pa que la mia alma nun muerra. Porque l'agonía física, biolóxica, natural, d'un cuerpu por fame, sede ou fríu dura pouco, bien pouco, pero l'agonía del alma insatisfecha dura tola vida".

    N'Egipto, las bibliotecas, nomábanse 'l tesoru de los remedios del alma. Ya asina curábanse nel.las de la ignorancia, la más peligrosa de las maluras ya l'orixe d'outras muitas.

    Nun sabemos cómo serán las bibliotecas del futuru. Sabemos qu' a lo l.largo de la historia hubo grandes cambios, empezando pola escritura en tablinas de barru, dempués los papiros, ya, dando un gran saltu nel tiempu, la invención de la imprenta que foi una gran revolución. Pero nas últimas décadas las cousas tán cambiando a un ritmu sorprendente. Las TIC revolucionaron el mundu. El l.libru electrónicu chega con fuercia, sobre too ente los nenos ya los mozos. Nun e-book puen l.levase cientos de l.libros almacenaos a cualquier parte ya ensin ocupar espaciu, nin tener que l.limpiar los estantes. Nun m'atrevo a suponer siquiera que pasará nun futuru próximu. De momentu resulta mui prestoso tener un l.libru nas manos, manosear las suas fueyas, ya dempués guardalu con estima y cariñu. Las bibliotecas yá hai un tiempu que prestan llibros dixitales. Esti añu, tenemos entrada a una gran biblioteca virtual: http://asturias.ebiblio.es, que ya l'entamu d'una forma de garrar l.libros ensin movese de casa.

    D'una ou outra manera disfrutemos de los l.libros. Invítovos a todos ya a todas a ser amigos de las bibliotecas. Acabo con un haiku dedicáu a los llibros.

    Versos y lletras,

    faraguyas del cielu

    na biblioteca.

    http://www.lne.es/blogs/manage

     

    Compartir en Twitter
    Compartir en Facebook