Blog 
Filazón
RSS - Blog de MªEsther  García López

Archivo

  • 05
    Julio
    2015

    Comenta

    Comparte

    Twitea

    Oviedo asturias

    Don Quixote nes fiestes de Piedrasblancas

     

     

    Homenaxe al personaxe inmortal de Cervantes nel 400.u aniversariu de la publicación de la segunda parte de les sos aventures
     05.07.2015 | 04:46

     

     María Esther García López  De cuando don Quixote llegó a Castrillón convidáu a les fiestes y a visitar el castiellu de Gauzón.

    Delantre de los allegres gaiteros y siguiendo la comparsa hasta'l prau de la fiesta, diben un grupu paisanes tocando'l panderu, vistíes con traxes típicos de dixebraos colores, y con pañuelos ataos a la cabeza como yera moda antaño. De xemes en cuando parábense a baillar y daben unes vueltes que dexaben ver los refaxos y los faldones de puntielles que llevaben per debaxo. Delantre d'elles diba un mayolón llargu con un palancón na mano y que dirixía los bailles qu'echaben en cada posa aquel grupu de pandereteres. El mozón aquel facíase xente delantre de tantos mirones como había a lo llargo'l recorríu y andaba p'atrás y p'alantre dándo-yos órdenes a aquelles muyeres.

    -¿Quién son éstes? Dixo una muyer que s'empobinaba pal parque. Otros años namás veníen los gaiteros.

    -Sí, señora, respondió-y el direutor de la banda de gaites que diba detrás, estes son les pandereteres de Piedrasblancas. Esti añu vinieron don Quixote y Sancho a la fiesta, y va presta-yos sentir el panderu. ¿Nun los vio pasar? Mire usté, enteróse don Quixote de qu'equí en Castrillón había un castiellu y nun paró hasta que dempués de munches hores de camín aportó a Piedrasblancas ayeri.

    -¿Don Quixote? Vusté nun ta bien. Cuantayá que vivió don Quixote. Si tovía tuviera vivu sedría inmortal.

    -Claro señora, inmortal, bien lo dixo vusté. Don Quixote ye inmortal.

    Delantre diben don Quixote y Sancho abriendo camín. La xente arremolinábase pa velos y saludalos y darréu don Quixote entamó a barrenar sobre aquel asuntu.

    -Sancho, mira tolo que tienen montáu nesti prau. A mi tán dándome ganes de volveme. Mira, ellí tán faciendo un fou, fou, Sancho y tienen un cabritu colgáu. Pero esta xente, son unos fartones. Y mira que cazuela tan grande, y mira meses enllenes de comida per tolos llaos. Pero, ¡cuánto vamos comer güei, Sancho! Mira, mira esi fou llega hasta'l cielu, mira que fumareda, too fumia nesti prau. Y ¿qué ye lo que suena tres de nosotros, Sancho? ¿Qué son esos güelpes tan acompasaos? Y ¿quién canta, al altu la lleva? Nun faen namás que dar voces. Mira, Sancho, el que vien delantre qué palancón trai. Pa mi que se van ensañar con nosotros. Yo por si acasu voi llevar la llanza a mano. Y mira cuántos gaiteros, Nun viste que nos abrieron pasu en dos fileres, una a cada llau de la calle, y venga a soplar la gaita. Sonar suena que da gloria. Eso sí, Sancho, dábenme ganes de baxame de Rocinante y poneme a tocar yo tamién.

    -Mio señor, déxese de tochures. De momentu vamos amarrar los burros a dalgún árbol, porque nun ve que nun paren de rinchar. ¿Nun habrá per ahí dalguna yegua salida? O será que sienten les gaites y lo mesmo s'espanten. Agarre bien el ronzal mio señor, nun seya qu'entamen a reburdiar. Enxamás nos montaron esti xaréu que nun somos a dominalos, y fame nun puen tener, pues bien sabe, vuesa mercé, qu'ayeri pacieron tol prau que ta rodiando'l Castiellu Gauzón, mientres nosotros lu visitamos. Estos burros pása-yos dalgo. Volviéronse desobedientes y tán bisueños.

    -Sancho, equí hai munchu xaréu, pero güel muncho bien, convidáronnos a comer, yo quédome, tanto me da que los burros rinchen como que se revuelquen. Átalos ehí Sancho anque seya a esi árbol que ta no mediu'l prau. Yá te dicía yo qu'a "Rocinante" había que capalu. Yá nun ye la primera vez qu'alloquez y me tira, y un día va matame Sancho.

    Y cola mesma, ensin más pensalu, cruciaron el parque La Llibertá y ataron los burros a un árbol.

    La xente quedó alloriada de lo que taben viendo: don Quixote y Sancho pel mediu'l prau, na fiesta de Castrillón. Dalgunos pensaron que taben viendo visiones.

    De sópitu, xubióse un representante de la fiesta al escenariu a esclariar esta sorpresa.

    -Bonos díes a toos y a toes. Sí, sí tán vustés no cierto. Lo que tán viendo nun ye ficción son don Quixote y Sancho que llegaron ayeri a Castrillón, espresamente pa conocer el Castiellu de Gauzón y otros monumentos que-yos vamos amosar. Y de pasu pa disfrutar de la fiesta.

    Y entamó a echa-yos un discursu de bienvenida. Convidólos a xubir al escenariu y don Quixote xubió darréu. Pero cuando vio dende ellí enriba aquel tropel de xente que s'arremolinaba delantre l'escenariu, encomenzó a barrenar y a maxinar coses rares y a llamar a Sancho a voces:

    -Sancho, Sancho, mira tolo que vei nesti prau. Sancho esto ye un exércitu, van d'uniforme, mira, van toos de verde pa confundise col prau. Ye un exércitu Sancho y tenemos que lluchar contra ellos. O tenemos que fuxir darréu. ¡Sancho, traime a "Rocinante" agora mesmu, sinón tírome d'equí embaxo!

    La xente entamó a rise y a glayá-y a don Quixote, que nun paraba de facer esparabanes y d'amenazar cola llanza y la espada, pasiándose d'un llau pa otru del escenariu. El mozu aquel nun sabía qué facer, y cada vez que don Quixote llevantaba la llanza, él encuruxábase y protexíase tres del altavoz que teníen preparaos los músicos. Muertu mieu, yá taba arrepintiéndose de convidalos a venir a Castrillón. Nun se maxianba que don Quixote diba alloriar y facer llocures. Por momentos, don Quixote foi encendiéndose y encomenzó a apaliar a ún de los altavoces.

    -Amira Sancho, gritaba Don Quixote engafentáu, esti ye'l cabezaleru. Tien mal fustax y ye'l que fala más fuerte, ta atronándome Sancho y voi acabar con él, sinón nun salimos d'equí vivos. Y entamóla col altavoz hasta que, ante l'asombru de los presentes, nun tris, fíxolu trices.

    La xente ablucada de vivir en direutu una de les tochures de don Quixote, tirábense toos pel suelu escagayándose de risa.

    Mio señor, baxe d'ehí agora mesmu -dixo-y Sancho-. Esta ye xente de paz que tán de folixa. Repare bien no que tien alredor y déxese de facer llocures

     

    Compartir en Twitter
    Compartir en Facebook