Blog 
Filazón
RSS - Blog de MªEsther  García López

Archivo

  • 06
    Enero
    2012

    Comenta

    Comparte

    Twitea

    Alicante

    El paquetazu

     

    Un  paquetón que yá ta envueltu dende'l 20-N y que namás contién recortes.

    Estos díes toos nos deseamos felicidá pal añu 2012. Nun ta mal facese ilusiones. Dicen los espertos na mente que pensar en positivu ye bono p'algamar lo que se quier. Pero amás de la tan ansiada felicidá invádennos otres sensaciones. Sobre too, incertidumbre y mieu. Encomenzamos l'añu cola sensación de que nun sabemos cómo se van solucionar los problemas de cuatro millones y mediu de paraos, de los que un 30% yá nun tienen subsidiu de desempléu. Los problemes de tantes families al borde de la probeza, de tantos xóvenes ensin trabayu, viviendo de los pas o de los güelos. Un 50% de la mocedá de menos de 25 años nun tien empléu. Los gobernantes nel poder garraron les tixeres con saña, y a recortar per tolos llaos. Namás garrar les carteres escaeciéronse de les promeses electorales, y a lo más fácil, a recortar. Los ricos sí, siguirán siendo más ricos, y los probes, más probes, y amás cada día la probeza estiéndese pel nuesu territoriu. Al empar siguimos asistiendo a casos como'l que'estos díes anubla la Casa Real. Urdangarín, «el yernísimu», ye la figura del chorizu millonariu que lo puede l'ambición de les perres. ¡Qué vergüenza! Y como él, munchos más entovía por descubrir. Los paraísos fiscales siguen xorreciendo y los sinvegüences qu'utilicen la so condición nel poder pa robar siguen ehí tan campantes.

    Esti añu, ¡vaya paquetazu que nos traen los «magos»! Por munches cartes qu'escribamos, la carta ya ta escrita dende'l 20-N, y firmáronla la mayoría de los españoles. Y podemos dicir que non na inocencia como los nenos. Toos sabíen bien lo que firmaben. Sí, los «magos» armáronse de tixeres y el conteníu del paquetón ye too de recortes. La xubida del IRPF, aumentu de les pensiones un 1%, ¡que nun ta nada mal! Una engañifa descarada. A los funcionarios, conxelación del sueldu y aumentu d'hores de trabayu, y a los paraos, ¿qué-yos traerán a los paraos? Dende llueu, nun hai nicios de que-yos traigan emplegu, porque les midíes que los «magos» nel poder tán tomando nun nos garanticen de que van solucionar la economía del nuesu país. Más bien vamos a peor. Bien nos lo dixo'l ministru d'Economía, peligra hasta la sostenibilidá del Estáu del bienestar. Echémonos a temblar. Pero ¿ye eso lo que prometíen fai dos meses? ¡De qué manera nos dexamos engañar! Onde ta escondíu'l nuevu presidente del Gobiernu. Sí, ¡el de les promeses! Dende que formó Gobiernu nun lo volvimos ver na tele. ¡Colo que-y gusta chupar cámara!

    Sin embargu, sabemos qu'hai otra forma d'abordar la crisis. Crear puestos de trabayu ye posible, pues n'otros países europeos el desemplegu ye testimonial; Austria, con un 4,1%; Luxemburgo, 4,7%; Países Bajos, 4,8%, y Alemania, 5,5%.

    Esti añu esperamos entós que los Magos d'Oriente nos traigan dalgún dulce, pero non carbón, pues por malos que fuéramos abondo tenemos cola negrura del panorama que nos espera.

     

     

     

    Compartir en Twitter
    Compartir en Facebook