Blog 
Filazón
RSS - Blog de MªEsther  García López

Archivo

  • 01
    Octubre
    2014

    Comenta

    Comparte

    Twitea

    En coche o andando

    Les práutiques de tresporte pa facer una sociedá más sostenible y saludable (13-9-2014)


     
      Prescindir del coche pue aportanos munchos beneficios a nivel mediu ambiental social, económicu y pa la salú.

    Entama'l cursu escolar y nun sé si por tar venceyada a la educación, siempre me faigo ecu d'esti acontecimientu social. Con ello viénenseme a la memoria distintos recuerdos de dómines pasaes. Fáiseme novedá cuando intento tornar p'atrás nel tiempu y veo una neña calzadina de madreñes, andando 8 km. diarios pa dir a la escuela, y yá, un poco más grandina, cuando me compró mio pá una bicicleta de segunda mano y entós yo facía el recorríu naquella bici que compartía col mio hermanu, y prestábame un cachu. Agora, tol día a caballu'l coche d'un llau pa otru, ensin pensar en volver aquellos tiempos nos que l'andar y la bici yera pa mi dalgo tan prestoso.

    Sicasí, siendo conscientes de que llegamos a un puntu en que tenemos que mirar pol planeta qu'habitamos, d'unos años a esta parte, por suerte, hai iniciatives qu'intenten conciencianos a los ciudadanos y ciudadanes del usu del tresporte públicu, alvirtiéndonos de los beneficios qu'ello pue aportanos a nivel mediu ambiental, social y económicu y por más, ye saludable.

    Beneficios que tamién nos proporcionen el dir caminando a los sitios y l'usu de la bici. Cada vez estes práutiques van faciéndose más necesaries pa disfrutar d'una sociedá sostenible en tolos ámbitos, dalgo polo que tenemos qu' apostar dende les instituciones y entidaes públiques y tamién de forma individual.

    Ello pasa pola educación en valores que tienen qu'impregnar el currículu escolar. Nesti casu entran en xuegu la educación mediu ambiental y la educación pa la salú. Pero tamién nos fai falta esta educación pa los adultos que, al fin y al cabu, somos pa los neños y xóvenes el modelu a siguir.

    D´otra miente, a esta concienciación súmense dalgunes entidaes como FAEN (Fundación Asturiana de Energía) qu'organicen y desarrollen distintes actividades lúdiques, deportives y educatives, col oxetivu d'apurrir ferramientes p'afalar al usu del tresporte públicu y al espardimientu de les sos ventayes ente tolos ciudadanos, llevando actividaes a los centros educativos.

    Son munches les ocasiones que podríemos prescindir del vehículu propiu, evitando les situaciones d'estrés que nos produz davezu guiar un coche. Porque garrar el coche paez que tresforma al individuu sacando, por veces, lo peor de nós mesmos cuando nos ponemos al volante.
     

     

    Compartir en Twitter
    Compartir en Facebook