Blog 
Filazón
RSS - Blog de MªEsther  García López

Archivo

  • 22
    Abril
    2014

    Comenta

    Comparte

    Twitea

    Estrenes

    Cuando vamos cumpliendo años "les estrenes" son recuerdos qu'enllenen el baúl de la memoria


     Hai díes señalaos a lo llargo l'añu nos que ye tradición estrenar. El día Ramos y el día de Pascua siempre yeren les primeres fiestes pa estrenar vistíu, muncho, porque son celebraciones mui señalaes y porque casi siempre coinciden cola entrada de la primavera. Nes últimes décades, neños y grandes tenemos los armarios enllenos de trapos y "la estrena" pue dicise que se repite cada pocu tiempu. Sicasí, nun hai nada que pueda torgar la ilusión d'una estrena. Seique toos tenemos guardaes nel maxín munches "estrenes". Estrenes de tou tipu, non solo de ropa. Munches estrenes que se van guardando na memoria y formen parte importante de los recuerdos que nun s'escaecen enxamás.

    A lo llargo'l tiempu, fui guardando ropes y otres estrenes nun baúl, nel baúl del maxín onde too cabe. Por veces, revuelvo nel mio baúl y "pruebo" los vistíos d'antaño. Los trapos que me traen recuerdos d'una o d'otra estrena. Y miro con señardá aquella falda d'acuarta, de tela vaquero y con tachueles alredor de los bolsos. Y mírome nel espeyu. ¡Qué risión! Nun soi quien a poner la saya nel so sitiu y fáltame un cachu na cintura pa poder abrochala. ¡Qué cintura! ¡Nun soi yo!

    Sigo revolviendo nel mio baúl. Alcuentro un pantalón, estrechu, de color azul cielu, un poco esmaltiáu. Dalgo ruxe nel bolsu. Alcuentro un papelín arrugáu y destiñíu. Nél ta escrito un poema d'aquellos años de mocedá. Lleilu, adulces, y viniéronseme a la memoria otres estrenes?

    Otra vez m'engañó'l tiempu esqueirando nel baúl. Nun yera a volver en mi y asitiame na dómina na que m'alcontraba. Una llárima viénoseme a los güeyos y fíxome recordar del "vaíu" que me sumiera dafechu na mocedá.

    Zarré de sópitu'l baúl, agora revueltu, como la mio vida. Como quien nun quier asumir que la ropa y les coses que taben allí guardaes yeren testigos fieles de que'l tiempu nun espera.

    Sicasí, enfotada en mercar dalguna prenda pa estrenar, fui a caleyar per Avilés d'escaparate n'escaparate. Nada, nun atopé nada. Tolo que vi yera igual de pequeño y minimalista que la mio ropa del baúl.

    Cuando reparaba atentamente nun maniquí, vistío con unos pantalonucos apegaos, una camisa brillante, y el pelo de colores, sentí que me picaben per detrás.

    -¡Ai, "trapinos, trapinos"! ¿Alcontrasti dalgo pa estrenar?

    ¡Qué sorpresa! Yera él, el del poema.

    De sópitu, otra vez revolviendo nel baúl y nel maxín, pudi ver nos sos güeyos que l'amor inda nun se destiñera?

    Y siguimos caleyando xuntos hasta alcontrar una ropa y un tiempu, otra vez d'estrena.
     

     

    Compartir en Twitter
    Compartir en Facebook