Blog 
Filazón
RSS - Blog de MªEsther  García López

Archivo

  • 16
    Octubre
    2014

    Comenta

    Comparte

    Twitea

    Guasapear

     Mandar mensaxes pol móvil fíxose una práutica habitual inclusive mientres vamos pela cai.

    Les necesidades de les ciudades van cambiando col pasu'l tiempu, y más güei que disfrutamos de tantes coses que cuasi nos paecen máxiques. Agora que s'encomenzaba a dotar a les ciudades de carril bici pa que los ciclistes nun tengan qu'ocupar les aceres y pa que puedan circular peles cais peatonales ensin molestar a los peatones, paez ser que ya hai quien demanda otru carril más, el carril per onde circulen los que falen (falamos) pel móvil mientres vamos andando o guasapeamos sin control y sin mirar pa lo que tenemos alredor. Por veces vamos tan ensimismaos que tropezamos cola xente que circula peles aceres, con faroles, con papeleres y demás mobiliariu urbanu.

    Lo que pasa que vamos tener que ser mui disciplinaos pa ocupar el carril que nos correspuenda. Los de la bici, pel carril bici; los peatones, peles aceres; los coches, pel carril que-yos quede; y los guasaperos, pel carril d'ellos. Va facer falta muncha organización. Colo indisciplinaos que somos nun sé si será posible. Y ye qu'esto de guasapear convirtióse nuna necesidá, o nun vezu, o nun viciu? Nun se cómo calificalu. Amás, si dalguién te manda un guasap y nun contestes darréu, hasta recibimos una bronca. "¿Pero nun viste'l guasap que te mandé?", repriéndennos munches veces quien se quier comunicar con nosotros. Y si nesi momentu nun tienes vagar, o tas ocupáu, o nun sientes el "rin" del móvil, pues yá ta entamada.

    Asina faise necesariu un carril pa guasapear tranquilos. Guasap, guasapear, guasapeando? Paez ser qu'estes pallabres ya vamos adautales al español y al asturianu. Porque ta tán enraigonáu'l vocablu que nun vamos ser a sustituilu por nengún otru. Sí, claro, cualquier idioma vese na necesidá d'inventar nueves pallabres pa nomar nueves aiciones o situaciones. Si miramos pa documentos d'hai pocos años nun vamos alcontrar por nengún llau guasap nin guasapear, porque ye un términu que naz cuando nos llegó esta aplicación a los nuesos teléfonos.

    A mi, como me gusta muncho tolo que tien dalgo de maxa, esto de falar con dalguién que tan el cabu'l mundu y poder velu pel teléfonu o manda-y un guasap y que lu vea d'inmediatu, paezme cosa de maxa, y dalgo de maxa debe tener. Pero, seya como seya, si entovía nun vos apuntastis a guasapear dígovos que ye bien prestoso. Too na so xusta midida. Poder mandar recadinos tan fácil ye una pasada. Enantes, teníamos qu'andar con papelinos emburuyaos, pa que nun nos pillaren los profesores pasándonos mensaxes y agora too ye muncho más fácil y más rápido. A los que ya nos pilló un poco vieyos, inda tamos a tiempu de garrar rapidez colos didos, como faen los más mozos
     

     

    Compartir en Twitter
    Compartir en Facebook