Blog 
Filazón
RSS - Blog de MªEsther  García López

Archivo

  • 07
    Marzo
    2016

    Comenta

    Comparte

    Twitea

    Oviedo asturias

    HORROS-POSADA

    Horros-posada

    L'esbarrumbamientu d'unes edificaciones tradicionales y de la llingua asturiana

    25.02.2016 | 03:47

    HORROS-POSADA
    Horros-posada

    M.ª Esther García Los políticos son responsables de la decadencia patrimonial y cultural n'Asturies. Sin embargu, nel país vecín, en Galicia, acaben de restaurar un horru o cabazu con otros fines que nun ye'l de graneros pal que fueron construíos nel so día. Ye en Carboeiro (Lugo) onde ta a puntu d'estrenase un horru como primer llugar de posada de pelegrinos. Un proyeutu al mio entender bien intelixente. Colos cambios sufríos na sociedá rural, los horros yá nun tien el papel que tuvieron nel so día nes nueses aldees onde les neveres y los arcones-conxelador sustituyen les despenses; los silos y los cambios n'alimentación del ganáu suplieron la función del horru como graneru. Los horros podríen tener otros usos ensin por ello perder el so interés como bien que forma parte del patrimoniu cultural y emocional d'Asturies, pues l'horru ensin granu sigue vivu na conciencia emotiva de los asturianos.

    L'horru ye una inxeniosa construcción que s'asienta en munchos llugares del mundu, pero n'Asturies ye un iconu cultural importante que forma parte del nuesu paisax. En pallabres de Xosé Nel Navarro, "pol modelu constructivu, pola so distribución xeográfica, pola so antigüedá, polos sos usos, pola decoración y otres coses, l'horru asturianu garra un significación específica ente los graneros alzaos esistentes nel mundu". Foron a lo llargo los sieglos construcciones de gran utilidá como almacén de granu y de la collecha, pero tuvieron otros munchos usos: despensa, palombar, colmenal, cuartu pa dormir, cuartu d'invitaos, alcoba de la nueche de bodes, paritoriu de les muyeres o llugar de dalgún qu'otru alcuentru amorosu "furtivu". Les referencies más antigües a los horros lléguennos de los historiadores romanos. Y la primera referencia asturiana data del añu 867, cuando'l rei Ordoño I, dona, al obispáu d'Uviéu varies ilesies y monasterios, y ente los bienes fai referencia al horru.

    Hai varies teoríes sobre'l so orixe. Dalgunos etnógrafos apunten a la prehistoria, otros considérenlos de procedencia romana, pero paez que lo más aceutable ye la so apaición nel Neolíticu, añu 10.000 A.C. cola llegada de l'agricultura. La primera descripción de los elementos del horru asturianu débese a Xovellanos: "L'horru ye arquiteutura cenciella, barata y bien pensada". El so amor por esta construcción lleva al nuesu ilustráu a querer ser enterráu nun horru, asina lo pide nel so primer testamentu. Paez ser que dende la Conseyería de Cultura del Principáu se ta trabayando sobre la forma de protexer y restaurar esti bien cultural. Esperemos que se faiga con acierto. Güei les subvenciones nun lleguen pa cubrir nin una tercera parte de los gastos y si somos realistes, dámonos cuenta de que la mayor parte los propietarios tienen que dexar los horros caer por nun tener perres p'arreglalos. Ye urxente tomar midíes y pensar en nueves aplicaciones y funciones. Espertos tenemos pa ello.

    Otra cosa será ¿cómo vamos nomar les partes del horru pa fuxir de la llingua asturiana? tan odiada por dalgunos cabezaleros políticos que refuguen el so usu, xunto col castellanu, nes actividaes parllamentaries. Vergoñosa actitú pa los asturianos la iniciativa entamada por Mercedes Fernández, cabezalera del Partíu Popular, que fai allarde públicamente nun tweet del so llogru antiasturianu; "hemos logrado que el castellano sea la única lengua del parlamento en Asturias". Pues qué bien. Taba meyor pensando n'otres coses más productives y non en gastar les enerxíes n'atacar al usu del asturianu. Nada, quedámonos ensin horros y ensin llingua. Gracies a estos cabezaleros que tán construyendo un país ermu no que cinca a la cultura y esto nun ye pola mor del cambiu climáticu, más bien pola falta de sensibilidá de los cabezaleros mediocres que nos gobiernen.

     

    Compartir en Twitter
    Compartir en Facebook