Blog 
Filazón
RSS - Blog de esther_garca

El autor

Blog Filazón - esther_garca

esther_garca


Archivo

  • 17
    Junio
    2013

    Comenta

    Comparte

    Twitea

    La Comia

    Del ataque a la collecha en tierres y güertos y hasta nos espacios zarraos

     

     Hai un tiempu que descubrí los güertos virtuales en Facebook. Anque l'esfuerzu pa trabayar estos güertos ye mínimu, nun me prestaron un res porque nun vi mui claro la satisfaición de recoyer una collecha virtual. Nun sé si se tratará de suplir el complexu d'agricultor qu'afeuta a parte de la población. Pero'l trabayar la tierra, siempre foi un trabayu mui duru. Hai que trabayar de sol a sol y dependiendo de la climatoloxía andar empitulláu faciendo les llabores propies de la llabranza.


    Dende va un tiempu a esta parte, estendióse'l cultivu nos ivernaderos, onde se crea un microclima artificial y medra too darréu. Pero tamién medren les males yerbes y la comia y si se quier tener una bona collecha hai que matar tou bichu viviente qu'apaez nel ivernaderu pa fartucase de les plantes y frutes que medren atechaes de los axentes esternos. Nun val con dir bendicir l'ivernaderu como se fai coles tierres, que pa escorrer la comia, garrábase un ramín de lloréu y augua bendita, y con unos rezares pa la ocasión, desapaecíen los llimiagos y escarabayos, sapos, ratos, topos y demás.


    «Afuera sapos ya ratos/ ya tola comisión,/ qu'aquí vos traigo l'augua bendita/ ya'l ramu de la pasión». Ya con esto la comia fuxía como por arte de maxa, ¡o del rezar! Pero güei la comia atácanos per uquier y nun hai manera d'escorrela. Ataca na facienda de los aldeanos, nos ivernaderos, nos güertos de Facebook y nos locales zarraos ensin ventilación, eso que se dio en llamar edificios intelixentes onde acaben alloriando los que pasen ellí munchu tiempu, y onde medra y s'alimenta una comia muncho más peligrosa que la de los ivernaderos. Nun sé si habrá que volver a los rezares d'antaño pa escorrer los bichos d'estos edificios onde l'ambiente ta enrarecío. Nun sé qué moda foi esta a la que s'apuntaron dellos arquiteutos de nun dexar ventanes, que se puedan abrir de par en par, pa qu'entre l'aire fresco y ventile los espacios y les cabeces pensantes. Pa qu'escuerra el mal humor y fluya la cordialidá ente la xente. Abondo ye tener que trabayar (dalgunos) pa enriba tener que soportar los bichos que medren nos llugares zarraos. A mi esto dame qué pensar.


    Volviendo a los güertos, lo último pa sentise agricultor son los mini-güertos nes terraces de los pisos. Esto paezme una idea brillante. Tolos que salimos de l'aldea pa zarranos nestes «xaules de ciudá» echamos a faltar, por veces, el tar escarbando la tierra. Seique, entós, pue resultar prestoso cavar la tierra anque seya nestos mini-espacios que paecen de xuguete. Esto ye como xugar a sentise agricultor. Yo toi pensando en poner ún na mio mini-terraza. La collecha nun será mui grande pero de xuru que sabrá perbién, y ¡ye ecolóxica! De toles maneres toi esmolida pensando si tamién llegará la comia a la mio terraza, porque entós dexo la idea pa prau.
     

     

    Compartir en Twitter
    Compartir en Facebook