Blog 
Filazón
RSS - Blog de MªEsther  García López

Archivo

  • 06
    Septiembre
    2016

    Comenta

    Comparte

    Twitea

    Oviedo asturias

    La fiesta la Blanca en Siñeiriz

     



     

    La Blanca en Siñeiriz

    Una fiesta que tien un aquel especial

    06.09.2016 | 05:08
    La fiesta la Blanca en Siñeiriz
     

    Esther García El día ocho de setiembre, dende hai cientos d'años, celébrase la fiesta de la Blanca en Siñeiriz, una fiesta mui guapa, familiar ya entrañable. You tengo al.lí muitos parientes pues miou buelu Celesto foi de Casa'l Cadabal.

    Cuando yera nena ya mozuca díbamos siempre a la fiesta ya prestábanos un montón baxar a misa a la capiya de la Virxe de la Blanca, güei restaurada, a caprichu, col enfoutu ya'l dineiru de los vecinos, ya que tien un retablu de muitu valor. Después, la comida festiva, igual que se sigue faciendo, onde se xuntan familiares ya amigos. Pero'l tiempu pasa ya unos ya outros vamos marchando pa fuera ya nun se pue tar en tolos sitios que te prestaría, anque nunca se pierde'l cariñu ya la familiaridá.

    Mozos ya mozas de los alredores díbamos andando a la fiesta, cantando ya faciendo dalguna qu'outra trasnada, ríndonos de too, como yía davezu na mocedá, que tien la risa siempre dispuesta a chenar d'endorfinas el cuerpu. Qué pena que la vida nos vaya quitando las ganas de rinos de cualquier cousa, ya hasta de cantar, ya dicir toladas.

    Al.lí, no Penéu la Fonte, onde inda se sigue celebrando, bail.labamos al son d'un acordión ou d'un dúu hasta entrada la nueite. Los que teníamos "sopas", a cenar a la casa de la familia, pa disfrutar de la verbena, ya los outros pa casa. El camín a recorrer yera tan divertío como la fiesta.

    Cuántos recuerdos prestosos d'estas fiestinas nas que nos divertíamos tanto ya nos conformábamos con pouca cousa. Nel.las hubo namoramientos que dieron en casorios ya tamién habría por veces desengaños.

    Las mozas abrían el bail.le ya facía falta bail.lar un bon cachu mozas con mozas pa que los galanes, "mirones el.los", se decidieran a "partinos" ya a entamar el bail.le con nosoutras. El.los facíanse los remolones, empinaban un pouco ya l.lou, cuando chegaba la escurecida yera cuando'l bail.le tomaba forma.

    Daquel.la, nas fiestas, nin nas grandes nin nas pequenas, nun esistía nin botellón nin outros vezos que faen que parte de la mocedá disfrute d'una manera mui distinta a como lo facíamos antaño. Yo como esta forma de divertise nun la practiquéi nun pueo opinar sobre lo que se sentirá, pero de tolas maneras, entristezme abondo.

    Sicasí la fiesta de la Blanca, como las outras de la parroquia La Montaña, inda conserva'l sabor tradicional ya si facemos comparanza, nun cambióu muito dende los mious años de mocedá, que ya chovéu; paez que tamos inda naquel.la fiesta d'enantes, el mesmu bail.le, entamao cuasique siempre por muyeres, unde bail.lan mozos ya non tan mozos ya hasta los nenos.¡Qué guapo! Esta convivencia festiva de comida ya diversión nun debiera perdese nunca.

    Dende estas l.linias, felicito a los organizadores, que son quien a conservar lo d'antaño ya saben amestar outras cousas d'anguaño qu'arriquecen las fiestas, celebrando la víspora con repartu del bol.lu ya bail.le, ya sobre too porque siempre nos reciben con amistá, siempre nos quedan ganas de volver a la fiesta de la Blanca a Siñeiriz.

     

    Compartir en Twitter
    Compartir en Facebook