Blog 
Filazón
RSS - Blog de MªEsther  García López

Archivo

  • 05
    Marzo
    2013

    Comenta

    Comparte

    Twitea

    Economia marketing sensorial olfativo pyme

    Llei Wert

    La nomada llei Wert amaga con un retrocesu na escolarización del asturianu

     El pasáu 21 de febreru celebróse'l Día Internacional de la Llingua Materna, proclamáu pola UNESCO'l 21 de febreru de 2000. L'entós secretariu xeneral de la ONU, Kofi Annan, resaltó la importancia de caltener la diversidá de les llingües y pidió mayores esfuerzos pa caltener les llingües como un patrimoniu común de la humanidá.


    Paralelamente a esta celebración, los aires nun soplen favoratibles pa cola llingua asturiana. Pasaron unos cuantos años dende que s'entamó n'Asturies cola so escolarización. Aquellos docentes qu'encomenzamos nel añu 1983 yéremos mozos y agora munchos tamos xubilaos y xubilaes y otros van camín de la xubilación, y tamos viendo cómo los problemes de fai más de 30 años amaguen con repitise nesti momentu. La llei Wert tien l'envís de facenos retroceder nel camín de la escolarización que, per otru llau, habría meyorase n'aspeutos como'l númberu d'hores nel horariu, especialidá pal profesoráu, xeneralización a tolos centros, etcétera. Dalgo que venimos reivindicando dende cuantayá.


    Más de cuarenta años de recuperación llingüística. Muncho trabayu fecho por parte d'investigadores, estudiosos, escritores, maestros y mayestres y por delles instituciones que trabayaron en favor del asturianu. Un llabor que dio como frutu toles ferramientes necesaries pa la normativización y estudiu de la llingua asturiana, y nesti sen tamos al nivel de cualisquier llingua del Estáu español. Pero la normalización nun foi pel camín paralelu. La falta de sensibilidá de los gobernantes, la ignorancia cultural, los complexos heredaos, qu'afeuten a bona parte de la clase política y a munchos estamentos sociales, fai que la llingua asturiana nun tenga l'estatus de llingua oficial como les demás llingües del Estáu. Dempués de casi mediu sieglu de recuperación del asturianu, siguimos oyendo les mesmes babayaes tresnochaes y a les que yá nun merez la pena responder. Tenemos que facer frente a los que faen dañu coles sos insidioses argumentaciones, negando a estes altures la esistencia del idioma asturianu, depreciando'l so usu y opinando con osadía sobre lo que ye o nun ye llingua, ensis afondar no qu'una llingua significa pa un pueblu. Los que maltraten la llingua torgando'l so usu, etcétera, etcétera. Y los que la incluyen nel programa ellectoral pa consiguir votos y llueu escecense dafechu de qu'esiste. A mí esto paezme un actu de cinismu social, una engañifa y falta de lealtá pa cola llingua d'Asturies y pa colos votantes. Como otres munches coses y promeses. Necesitamos urxentemente un consensu políticu y apuesta seria y rigurosa pola oficialidá. Ye mui fácil cacarexar dende la oposición pero una vez na poltrona escaécense de que tán gobernado'l pueblu d'Asturies. Yá nun ye tiempu de xugar con dalgo tan delicao. Les voces de los que la defendemos son munches y tienen qu'oyise en tolos foros y, sobre too, hai qu'atronar'n'asturianu a los qu'un día tres otru torguen el so usu y la so dignificación.

     

     

    Compartir en Twitter
    Compartir en Facebook