Blog 
Filazón
RSS - Blog de MªEsther  García López

Archivo

  • 17
    Junio
    2015

    Comenta

    Comparte

    Twitea

    Oviedo asturias

    LLORAR

     La risa y el llantu son manifestaciones fisiolóxiques qu'espeyen l'estáu d'ánimu de les persones.
     Llorar ye la primer manifestación emocional cuando llegamos al mundu. Si'l neñu nun llora al nacer ye señal que dalgo nun foi bien nel partu. Quiciabes el llantu del nacimientu ye'l primer alcuentru cola tristura de la vida, un alvertimientu de munches situaciones que vamos alcontrar nel camín y nes que se van repitir riaes de llárimes. Naide nos enseña a llorar y salimos llorando del la barriga de la ma. Deprendemos muncho primero a llorar qu'a falar, muncho primero qu'a echar un sonrisa. Esto da que pensar.

      Sentimos por veces dicir qu'esti mundu ye un valle de llárimes. Sicasí, nun dexa de ser un consuelu el saber que llorar ye sanu. Dicen los espertos, estudiosos de les emociones humanes, que llorar meyora la salú física y emocional. Ye un aliviu poder llorar cuando sentimos pena. Ye bono desafogase. Sentímonos lliberaos dempués de soltar les llárimes, anque tamién lloramos d'allegría. ¿Serán llárimes diferentes?

      El lloru y el dolor son recursos de poetes y cantantes. Préstanos lleer composiciones que faen referencia a les emociones que tienen el llantu como respuesta y davezu empatizamos colos protagonistes. De xuru porque nos recuerden momentos tan reales como la vida mesma.

      L'ello ye que tol mundu llora, lloramos a cualquier edá, lloren los ricos y los probes, lloren los nenos y los vieyos. Seique col pasu'l tiempu vamos faciéndonos más duros, y a les llárimes, lo mesmo qu'a la risa, cuesta-yos más manifestase. Por veces lloramos per dientro, pa non manifestar a los demás les tristures que nos amaguen. Ye como si llorar tuviere güei mal visto.

      Afondando nesto, fáisenos raro ver un home llorar. Permítome facer estes reflexones. ¿Llorar ye más bien cosa de muyeres? ¿Considérennos asina más débiles, o más emotives, o más receutives al dolor? ¿Será qu'ellos nun espeyen el sufrimientu? O será que se faen los duros y quiciabes lloren en silenciu. Ellos tamién lloren al nacer ¿Qué pasa entós dempués? ¿Tenemos daveres asumío que llorar ye cosa de muyeres?

      Ello ye qu'hai empresarios que tán sollertes pa xugar coles emociones. Y esta vez son precisamente les muyeres y el lloru los protagonistes. En Xapón, un hotel de Tokio fai una promoción na qu'ufierta "habitaciones del llantu", eso sí, pa muyeres. Cuartos equipaos con pañuelos de papel, películes tristes, revistes y cómics manga, pa les más sensibles. Too p'afalar a les muyeres a llorar con ganes, con comodidá y con discreción; llorar a soles pa poder desafogase a gusto. Y dempués de cansase de llorar, los remedios pa que nun se note: cremes y potingues de los más caros, pa disimular l'hinchazón de los güeyos y la mala cara.

      La humanidá llora, nun hai dulda, pero los que más tienen por qué llorar, de xuru que nun van tener perres pa pagar l'habitación del llantu. Tendrán que llorar en cualesquier requexu onde la tristura los asalte y esperar a que los güeyos deshinchen solos y nun espeyen la tristura de la vida.

     

    Compartir en Twitter
    Compartir en Facebook