Blog 
Filazón
RSS - Blog de MªEsther  García López

Archivo

  • 18
    Diciembre
    2013

    Comenta

    Comparte

    Twitea

    Lluces pantasmales

    Necesitamos lluz qu'illumine esta sociedá "a escures".
    La crisis va notándose nos preparativos pa la Navidá. Hai ciudaes que se quedarán sin les típiques lluces qu'adornaben les calles y otros requexos. A mí, si vos digo la verdá, nun m'importa muncho. Préstame la escuridá de la nueche, sobre too cuando nos amuesa un cielu estrelláu. Lo malo ye qu'esta falta de lluces artificiales podríemos dicir que ye espeyu de la negrura que nos ta tapeciendo la lluz nel día a día, la negrura que nos va anublando la ilusión y la esperanza.

    Pienso que tolos años por estes feches la lluz ye protagonista d'escritos, de poemes, de felicitaciones y deseos. Qué más quixéremos que la lluz allumara esta nuesa sociedá "a escures" y que munchos de los que lo necesiten tuvieren una lluz que-yos illuminare'l camín.

    D'otra miente, nun podemos escaecer que la lluz siempres tuvo presente na fantasía popular. La lluz ye vida, pero tamién ta venceyada a la muerte, al más allá, a lo desconocío.

    Nes últimes décades, cola illuminación pública que llegó a munchos pueblos, van desapaeciendo les pantasmes y les lluces pantasmales. Sicasí, pantasmes atopamos abondes pel día y son de carne y güesu, y éstes pueden facenos muncho más mal qu'una pantasma solombriega de les que nos asustaben en caminos y caleyes. Estes pantasmes inmateriales tán en munches ocasiones asociaes a fenómenos lluminosos. Por veces, en dellos sitios, na escuridá de la nueche, apaecen lluces máxiques que nun proceden nin de les estrelles nin d'otros xeneradores artificiales y tán asociaes a esti mundu pantasmagóricu, sobrenatural? Na nuesa xeografía hai abondes lleendes y rellatos populares onde la lluz ye protagonista. Lluces nos cementerios, lluces nos caminos y nos requexos más escondíos, que s'asocien apaiciones y rellaciónanse cola muerte. Cuando nes cases nun había lluz eléctrica, víanse lluces máxiques per uquier.

    Pero nestos últimos tiempos tenemos demasiaos esmolecimientos y hasta la maxa va mermando. Valdrános más maxinar con fuercia lluces qu'allumen les mentes d'estos gobernantes que nos tán dexando'l país "a escures". Necesitamos lluz qu'allume esti camín de solombres y de toxos que nos espinen. A ver si d'una vez "vemos la lluz al final del túnel", d'esti "túnel" estrechu y enllenu de pilancos que nos ta siendo tan difícil travesar.

    Deséovos que nesta Navidá la lluz allume los vuesos deseos, yá illumine esti mundu chenu d'escuridá.

     

    Compartir en Twitter
    Compartir en Facebook