Blog 
Filazón
RSS - Blog de MªEsther  García López

Archivo

  • 24
    Diciembre
    2012

    Comenta

    Comparte

    Twitea

    Tenerife Nacional

    Lluz

    Esti añu  la escuridá anubla  la Navidá y medra ensin tientu.


    El camín de la vida ta enllenu de lluces y sombres.  La sombra tien  connotaciones negatives y, por eso, pa nós,  lo más atrautivo ye la lluz.
    Namás tenemos que ver  en cuántos momentos de la vida  tenemos la lluz como elementu relevante. Lluz  cuando nacemos, lluz cuando morremos y lluz potente en celebraciones y ritos. Lluz que resplandez nos momentos bayurosos. Pero tamién  se pue afirmar, qu'onde hai lluz  hai sombres.
    Esti añu  munches ciudaes quédense mediu a escures pola mor de la crisis. Nun hai lluces qu’allumen la Navidá. Y ello tien amás, pa nós,  otres connotaciones negatives qu’influyen nel estáu d’ánimu, porque percibimos qu’esa “escuridá”  llega más allá de la falta de les  espectaculares lluces que nestos últimos años illuminaben les calles y alimentaben,  como otres coses, el consumismu nestes feches. La tristura ye d’otru xeitu.  Munchos llares tarán  a escures esta Navidá, pero non pola falta de les lluces de  colores. El paru, los desahucios y la falta de perres pa llegar a fin de mes, anublen dafechu estes fiestes, y la escuridá siguirá   anublando,   día tres día, a munches families. Podemos afirmar que’l  mundu ta quedándose  a escures. Y tamos  viendo qu’esa escuridá amáganos con  durar más de la cuenta. Vamos tener qu’avezanos a vivir  con menos cantidá de lluz. Y nun puedo por menos que  calistrar na memoria,  facer un repasu por époques pasaes,  cuando la nueche nos paecía más escura.  Puedo ver nidiamente la lluz d’aquel candil de carburu qu’allumaba na mio casa cuando yera nena. O aquella lluz  que paecía un llumín, fecha dientro d’una taza, con sal y aceite  y una mecha d’algodón. D’esto fai unos cuantos años. Pue dicise que vivíemos  les nueches y otros acontecimientos  “a media lluz”. Daquella non sólo pasábemos la Navidá a  escures, tamién  pasábemos les llargues nueches d’iviernu  medio a escures. Sicasí,  la lluna allumaba dacuando  la nueche  y  podíemos contemplala con almiración y agradecimientu. La Lluz de la Lluna entraba pela ventana y colábase por cualquier   furaquín.
    Pero  güei, avezaos a tanta lluminaria en faroles, escaparates, lletreros  y otros puntos, cuando con tanta contaminación lluminosa  la Lluna cuasique nos pasaba desapercibida, vamos tener que  volver a mirala con almiración y disfrutar de la maxa de la nueche. Lo importante ye que la escuridá nun medre y nun  nos dexe siquiera un llumín de lluz.
    Yo deséovos  nestes feches señalaes, cuando esti añu tan escuru ta a puntu d’acabar, que la lluz vuelva a brillar nel mundu, la lluz de la xusticia, del amor, de la paz y de la solidaridá. Esa ye la verdadera lluz.
     Amo a la Lluna.

     

    Compartir en Twitter
    Compartir en Facebook