Blog 
Filazón
RSS - Blog de MªEsther  García López

Archivo

  • 06
    Enero
    2014

    Comenta

    Comparte

    Twitea

    Los regalos

     Facer presentes a familiares y amigos ye una tradición que vien de mui antiguu

    La costume de regalar foi espardiéndose y medrando en Navidá, cuando tenemos que mercar coses pa tola familia. Estos díes les calles tán enllenes de "reis magos", anque de magos tienen poco; los regalos tienen la so maxa pero sábennos al bolsu. Sin embargu, por más que seya dalgo, cuasique, rutinariu, ye una forma de demostrar apreciu y cariñu. Nun podemos negar que nos presta la sorpresa de los regalos y que ye una forma d'alimentar la ilusión, que bona falta nos fai.

    Col pasar del tiempu, la publicidá amáganos per tolos requexos y llega a los llugares más remotos. Asina los neños volviéronse interesosos y son víctimes d'esti consumismu que toos prauticamos y-yos tresmitimos. Cuando yo yera nena (claro que dende aquello yá llovió) los Reis Magos yeren pa nos un mitu, anque namás nos dexaren na ventana unes zapatiyes, un bollu dulce, unos carambelos de perrona y nel meyor de los casos una moñequina de cartón. Acuérdome d'una moñeca que tenía un pelu roxo perguapu que se desapegó de la cabeza a los dos díes, cuando-y la moyé por primera vez, dexándola calva o más bien cuasique sin cabeza. Sin embargo, a los nenos d'agora, los que tienen la suerte de tener una economía familiar aceutable, los Papá Noel y los Reis tráen-yos mil xuguetes de lo más sofisticao y a los dos díes cuasique nun miren pa ellos.

    Sicasí, pudiéremos pensar que la costume de facer regalos ye dalgo que nos llega con esti consumismu descomanáu que nos amaga per uquier. Pero esta tradición vien de mui atrás. Nos pueblos griegos y romanos esta práutica de dar regalos apaez dende los sos oríxenes. Na Odisea, el rei de Thesprotia amuesa los presentes recibíos d'Ulises, que consistíen en valiosos metales, bronce, oru y otros bien preciaos na dómina; tan abondosos que bastaben p'arriquecer a quien los tuviere hasta la décima xeneración.

    Primero que s'instituyeren les fiestes de Navidá, yá en Roma teníen una intensa cultura del regalu. Cuando entamaba l'añu, yera habitual que los homes-yos fixeren regalos a les sos muyeres. Esta costume tuvo munchu puxu a partir del añu 150 A.C. nel que se tresllada'l comienzu del añu civil al primero de xineru. Daquella tol mundu s'intercambiaba regalos (amuletos, colgantes y otros bixos) porque taben na creencia que yera la meyor manera d'atraer la suerte. Amás regalábense coses pa comer. Esquisiteces como salazones, miel, figos secos, etc. Y, como regalu especial, unes monedes de cobre d'escasu valor, pero col envís d'atraer perres y riqueza.

    Güei nel mundu rural inda siguen intercambiándose y regalándose productos de la casería: chorizos, morcielles, miel y otros manxares. Amás, cola seguranza de que van ser bien apreciaos por quien los recibe.

    El regalu foi y siguirá siendo una muestra d'afeutu y cariñu y mientres nos mantenga la ilusión, podemos dicir que ye una tradición prestosa, siempre que nun nos esclavice pola mor de que detrás ta la machacona publicidá, inventando feches y "díes de" pa que gastemos les perres
     

     

    Compartir en Twitter
    Compartir en Facebook