Blog 
Filazón
RSS - Blog de MªEsther  García López

Archivo

  • 04
    Noviembre
    2014

    Comenta

    Comparte

    Twitea

    Maternidá programada

     

    Les grandes empreses busquen nueves formes de controlar a los y les trabayadores.
     

     M.ª Esther García, Escritora  Nuevos modelos de "paternalismu" xéstense nes empreses del sieglu XXI. Hai yá unos años, dalgunos empresarios regalaben teléfonos móviles y ordenadores portátiles a los sos trabayadores. Sabíen perbién qu´esto yera una nueva forma de relación llaboral na que la llende ente les hores de trabayu y la vida privada del trabayador encomenzaba a borrase. Una forma más de controlar al trabayador.

    Estes y otres práutiques-engañifa faennos reflexonar sobre les estratexes que nos caberos años empleguen les empreses pa esprimir a los sos trabayadores, quiciabes a los que tán dispuestos a ser sumisos y vivir namás por y pa la empresa. Por más que sepamos qu´amás de les hores de trabayu necesitamos tiempu pa folgar y pa dedicanos a la familia, y a otres coses que nos presten.

    Pero les estratexes de control van más allá. Dos de les grandes empreses teunolóxiques, Facebook y Apple, enguaden a les sos emplegaes ufiertándo-yos conxelar óvulos cuando tán n´edá fértil y, per otru llau, a plenu rindimientu nel trabayu. Conxelar óvulos pa que puedan posponer el momentu de ser madres cola tranquilidá de que van poder ser madres cuando yá podríen ser güeles. Esa ye la realidá que persiguen. A mi paezme que quiciabes debieren facilitar y poner los medios pa que pas y mas pudieran compartir la feliz esperiencia de tener y criar a los fíos cuando-yos pete. Meyor taben discurriendo formes y medios pa favorecer la conciliación familiar, más qu´ alendar a la mocedá a que nun tenga los fíos tan pronto, porque asina aseguren plena dedicación a la empresa, con horarios maratonianos y entrega dafechu de los pas y mas en potencia.

    Ye verdá que güei la mocedá piensen muncho les coses pa traer un fíu al mundu. Quiciabes nun-yos faltarán razones. Families en paru, sueldos baxos, y en xeneral la precariedá llaboral que tan sufriendo merma la ilusión por esti acontecimientu familiar. La demografía ta sufriendo grandes cambios. Los espertos alértennos de que ta previsto que n´España dientro de 50 años seyamos seis millones menos d´habitantes. El crecimientu vexetativu va ser negativu y la esperanza de vida elévase enforma. Un país de vieyos. Si, amás, por parte de les empreses s´incentiva a les muyeres pa que retrasen el momentu de tener los fíos: un país de vieyos con dalguna qu´otra "ma- güela" pasiando´l carru del neñu. Madre cuando yá nun tien rixu nin ganes, nin humor pa criar la criatura.Y eso suponiendo que nun falla la fecundación in vitro del óvulu guardáu.

    Con estes práutiques agravaráse´l desequilibriu de la pirámide demográfica. Por munchos óvulos que tean conxelaos, les muyeres que vayan posponiendo la edá de tener fíos, cada vez más, van dir mermando-yos les ganes y medrando la pereza. Aburriráles ponese a parir a una edá na que les fuerces tamién mermen. Nun pienso que seya fácil tener un fíu a los sesenta años, cuando ya teas a puntu xubilate y yá la empresa s´aprovechara dafechu de la to mocedá y entrega, eso sí, cada vez por menos sueldu.
     

     

    Compartir en Twitter
    Compartir en Facebook