Blog 
Filazón
RSS - Blog de MªEsther  García López

Archivo

  • 24
    Abril
    2013

    Comenta

    Comparte

    Twitea

    MIEU

     

    El  mieu ta metiéndonos en casa

    Nesta época, na que la lluz alluma per uquier, sentimos, más que nunca, la presencia del mieu. Enantes teníamos mieu a la escuridá, porque, aprovechándose de la nueche, amagábennos les sombres y les pantasmes. Güei atopamos pantasmes dañines a plena lluz del día.Y como n'antítesis de la lluz que nos alluma, la escuridá, encubierta, anubla la vida cotidiana y el mieu caltria nes coraes de la nuesa sociedá.


    El mieu ye dalgo innato al ser humanu. Cuando somos pequeños yá tenemos «terrores nocturnos», y esto va agravándose col correr de los años que ye cuando vamos pescanciando tolos peligros que nos amaguen.


    El mieu ye collaciu nuesu tola vida, anque, por veces burllámonos dél. Una mestura de situaciones angustioses llámennos l'atención y provóquennos sensaciones que nos prestan. Situaciones medranoses cáusennos hasta risa y bon rollu. Por exemplu cuando disfrutamos con una película de terror.


    Pero hai otru tipu de mieu: el que sentimos en momentos y contestos difíciles. Esto ye otru cantar. Son les crisis personales, perdida d'un ser queríu, enfermedaes, y situaciones adverses, les que nos dan velea y nos faen sentir el mieu con más intensidá. Y hasta se convierte por veces en dalgo patolóxicu . Falamos d'angustia, de pánicu, d'estrés ante situaciones llende que se presenten a lo llargo de la vida.


     Pero güei, más que nunca somos preses del pánicu escénicu nesti escenariu de crisis nel que «los poderosos» nos ufierten, a diario, escenes d'angustia. Nós somos espectadores-sufridores, amedranaos pol so discursu autoritariu ya impositivu, que lleven a la práutica ensin nengún tipu d'escrúpulos. Mieu al despidu, mieu al desahuciu, a nun poder pagar la hipoteca, mieu a nun alcontrar trabayu , mieu a perdelu, mieu a nun llegar a fin de mes? Mieu que s'esparde a traviés de los medios de comunicación que nos amedranen a cada momentu.


    D'otra miente, el mobbing o acosu nel trabayu ta dándose más que nunca, porque los trabayadores nun pueden gorgutar por mieu a que los manden pa casa y aguanten cada vez más, mientres los acosadores miedren nesta situación provocada pola falta d'un emplegu dignu pa ganase'l pan. D'ello aprovéchense munchos de los patronos, esprimiendo a los emplegaos, ensin tener en cuenta los sos drechos. Mieu a falar, mieu a reivindicar , mieu a retrucar?


    Pero non sólo'l mundu llaboral ye escenariu del mieu. Otros contestos tórnense en llugares medranosos, porque más que nunca l'autoridá convertióse n'autoritarismu, nun s'escucha a naide y vivimos nesti mundu dictatorial ya inxustu y del sálvese quien pueda.


    Sin embargu tenemos qu'apostar pola allegría y l'optimismu, y buscalos ellí onde tean arrequexaos. Hai que lluchar contra'l desencantu. Un mundu meyor ye posible y tenemos que consiguilo ente toos.
     

     

    Compartir en Twitter
    Compartir en Facebook