Blog 
Filazón
RSS - Blog de MªEsther  García López

Archivo

  • 10
    Mayo
    2012

    Comenta

    Comparte

    Twitea

    Alicante

    Nueche Blanca

    Les actividaes que se celebren n'Avilés esti fn de selmana.
    Cuántes nueches en blanco pasamos a lo llargo de la vida. Pue pasase una nueche en blanco por munches causes. Ye un mal rollu cuando  nos deitamos y nun podemos  garrar el sueñu.   El tiempu encomienza entós a xuganos una mala pasada y les hores son eternes. Sin embargu  güei  pásense nueches en blanco por otres razones, la nueche fízose la reina del tiempu y del espaciu y podríemos afirmar  que,   sobre too,  los xóvenes pasen tolos fines de selmana nueches en blanco.
     El conceutu de la palabra nueche  foi cambiando  a lo llargo del pasáu sieglu, colos nuevos inventos, colos  vezos sociales y colos avances   teunolóxicos que  la fueron tresformando. La nueche  foi sufriendo cambios qu’inclusive ampliaron enforma'l propiu significáu d’esta palabra.  Hasta hai  unes décades  la palabra nueche traíanos a la memoria imáxenes d’escuridá, de negrura, de cielu estrelláu, de nueche de lluna. Güei, los que vivimos en ciudaes  cuasique nun “vemos les estrelles” namás que cuando  sentimos un dolor fuerte, porque les calles  tán enllenes de lluces y de lletreros lluminosos que nos impiden contemplar el  firmamentu. Podemos dicir tamién  que s’acabaron les pantasmes y solombres que nos  amedranaben  aprovechándose de la escuridá. Agora otros seres pantasmales  muncho más dañinos caleyen per uquier.  Vivir la nueche ta de moda, como si fuera daqué que nun s'acaba y que queremos aprovechar a tope. La palabra nueche trainos a la memoria otres imáxenes  bien distintes: movida, diversión, lluces,  ruíu… n’antítesis  del conceutu d’escuridá, silenciu, misteriu, tiniebles… Pa recuperar estes sensaciones tendríemos que marchar pa dalgún llugar  alloñáu de la ciudá, en  mediu ‘l campu,  porque güei, hasta los pueblos más pequeños   tienen lluces publiques qu’allumen los caminos y  l’antoxana de les cases.  Nun sé si la crisis, la negrura social que tamos viviendo,  nos obligará a recuperar la escuridá y  l’encantu de la nueche pero   tamién nos ta faciendo  pasar abondes nueches en blanco.  Quiciabes tengamos qu’apagar faroles,   escurecer escaparates, apagar lletreros y bombilles. quiciabes los poetes volvamos al romanticismu  nocherniegu. ¡Qué poeta nun cantó dacuando a la nueche!  Nun hai dulda que la poesía ye  una alliviu, una cura pal espíritu, porque la crisis ye económica, de valores, social pero non creativa.  Nun dexa de ser un consuelu.
    Y dempués d’estes consideraciones, tamién como antítesis de la nueche escura, acércase la Nueche Blanca que se celebra n’Avilés esti fin de selmana  na que podremos disfrutar de la so “illuminación” con esposiciones, conciertos, performances y otres actividaes.  Los artistes   amosaránnos   cómo vivir de la meyor manera una nueche en blanco.

     

     

    Compartir en Twitter
    Compartir en Facebook