Blog 
Filazón
RSS - Blog de MªEsther  García López

Archivo

  • 09
    Septiembre
    2013

    Comenta

    Comparte

    Twitea

    Osos

     

     La presencia del osu comienza a esmolecer a la xente del Suroccidente

    Hasta hai unes décades, l’osu n’Asturies  atopábase nuna situación  cuasique llaceriosa, y facíanos pensar que, si nun se tomaben midíes, diba camín de la estinción, como otres especies. Pero, según noticies apaecíes estos díes nos medios de comunicación, en dos décades, la población d’osos triplicóse na comarca del suroccidente d’Asturies. Y como nunca llueve a gusto de toos, l’aumentu d’exemplares d’esti animal, y con ello la so presencia  en distintos espacios de la zona, trai consigo un ciertu esmolecimientu de los vecinos. Per un llau, los ganaderos ven el peligru d’estos animales grandones, que si tienen fame pueden atacar a les reses y per otru, esmolécense los apicultores, que teniendo en cuenta que l’osu ye un animal llambión que- y gústa muncho'l miel, va visitar, de xuru, los cortinos que nun tean bien zarraos.
    Pero quien sabe si la presencia d’osos nos espierta sentimientos ancestrales negativos hacia esti animal. Plinio'l Viejo, na so Historia Natural, yá contribuyó a esparder el simbolismu negativu del osu. Sorraya’l paecíu físicu ente l’osu y l’home, y describe cómo copulaben los osos, barriga con barriga, abrazándose como los humanos. Anque esto tea demostráu que nun ye asina.
    La Biblia tamién nos apurre, en distintos pasaxes, un retratu bien negativu d’esta fiera. Quiciabes el más conocíu ye’l que rellata como David, cuando yera pastor, lluchó contra un osu y un lleón que-y robaben les oveyes y acabáben-y col rebañu.
    La presencia del osu cerca les cases, trainos a la memoria les lleendes que taben llatentes nel imaxinariu de la xente. N’Asturies son munchos los cuentos tradicionales y lleendes que tienen como protagonista al osu. Mui conocida ye la lleenda que cuenta que’l rei asturianu Favila, morrió mui xoven nel enfrentamientu con un osu. Lleendes tán singulares como les que narren amores monstruosos y carnales, onde los osos faen l’amor con muyeres, poles que sienten especial atraición. D’esta convivencia íntima nacen criatures metá humanes y metá osos.
    Pero podemos dir a les cultures antigues, onde l’osu ye tamién protagonista de munches lleendes, por exemplu, la de la guapa xoven Calisto, que nun quería saber nada d’homes. Prestaba-y cazar cola diosa griega Artemisa. Zeus namoróse de Calixto y 'poseyóla' con engañifes. Artemisa, cuando s’enteró, enrabiada, disparó-y una flecha que-y fixo parir, y, darréu, convertióla n’osa. Dende aquella caleyó pelo s montes. Mientres, el so fíu, Arcas, llegó a ser rei d’Arcadia. Un día qu’Arcas taba cazando alcontróse cola so ma- osa, y cuando se disponía a matala, Zeus tresformólu a él tamién n’osu, y fízolos xubir a entrambos a la bóveda celeste, onde se tresformaron nes dos constelaciones: la Osa Mayor y La Osa Menor, que por pidimientu de Zeus a Poseidón, son les úniques   que nos miren, de contino, dende'l cielu  estrelláu.
    Quiciabes la presencia d’ osos nos montes asturianos, nos lleve a revivir les lleendes y repasar otros testimonios sobre l’osu a lo llargo de la historia, cuando yera’l rei de los animales n’occidente, destronáu fai dellos sieglos por Lleón. Pero, sobre too, amaganos el mieu a atopanos, en cualquier llugar con esti animal descomanáu.
     

     

    Compartir en Twitter
    Compartir en Facebook