Blog 
Filazón
RSS - Blog de MªEsther  García López

Archivo

  • 03
    Octubre
    2013

    Comenta

    Comparte

    Twitea

    Padrinos y madrines

    Los padrinos y madrines ampárennos en distintes situaciones

    El que tien padrinos bautízase. Esti refrán, ye ún de los argumentos que vengo escuchando dende neña pa criticar a los que consiguíen les coses por mediación de quien tien influencies. Sin embargu agora puen tenese padrinos ensin bautizase. Una cosa ye'l padrín de pila, y otra ye'l padrín que los pas-y busquen a los neños que nun se bauticen, pa presentalos en sociedá. Sicasí, con bautismu o sin él, sigue habiendo padrinos y apadrinaos, y nel mundu al que se refier el refrán, enchufaos, recomendaos y demás? La figura del padrín ta dafechu presente cada vez con más puxu.


    Tamién se-y llamaba padrín al padrastru, buscando una pallabra más cariñosa pa nomar esta figura familiar. Pero nos tiempos que cuerren, con tantos tipos de families, aumentó enforma'l númberu de padrastros y madrastres y toi segura que yá nun se-yos llama padrín nin madrina. Más bien se-yos llama pol so nome. Quiciabes porque tantos padrinos d'un llau y d'otru y, por veces, pa pocu tiempu, hasta se prestarán a enguedeyu.


     D'otra miente, podemos apadrinar proyeutos, árboles, perros, burros, vaques o hasta gochos y otros animales.Y cuantayá que s'apadrinen neños y neñes d'otros países p'ayudalos nes sos necesidaes básiques. Alcuérdome que na mio etapa d'escolina y pente medies de la Santa Infancia teníemos afiaos en llugares que nos paecíen que taben nel cabu'l mundu. Con una peseta o dos, yéremos madrines d'un neñu o neña, y escoyíemos el nome que-y queríamos poner. Güei hai munches ONGs bien organizaes que nos permiten ayudar a estos neños del tercer mundu. Y tamién n'España hai neños que, por dixebraes circunstancies, tán acoyíos en ONGs y que necesiten ser apadrinaos. Sicasí, a poco que reparemos al nuesu alredor, tal como se tan poniendo les coses, hai families que necesiten padrinos y madrines pa que-yos ayuden na crianza de los sos fíos. Hai munches families que tienen que tar sosteniéndose a costa de los pas y los güelos. La tixera afeuta a los más desfavorecíos socialmente. La velea de saber qué va a pasar dientro d'unos años esmoleznos a toos.


    Y nesta situación de recortes sociales que tamos sufriendo, apaez de nuevo la figura del padrín o la madrina que van tener un feixe de responsabilidaes. Quién nos diba dicir que n'España pola mor la subida de tases académiques, y la merma de les beques, se diba que tener que recurrir al apadrinamientu, pa que dalgunos xóvenes que nun tienen posibles, puedan dir a la Universidá. Una actitú caritativa que nun ta mal, pero nun ye la solución a esti grave problema. Namás serán los ricos los que puedan estudiar anque seya pa dalgunos d'ellos a fuerza d'echar años y años na Universidá. Estos yá tán bien apadrinaos.
     

     

    Compartir en Twitter
    Compartir en Facebook