Blog 
Filazón
RSS - Blog de MªEsther  García López

Archivo

  • 30
    Julio
    2016

    Comenta

    Comparte

    Twitea

    premiu timón

    Premiu "Timón"

    Escritora

    Premiu "Timón"

    Recibir un galardón, y más "en casa", ye un honor y una gran satisfaición

    30.07.2016 | 05:40

    Premiu
    Premiu "Timón"

    Esther García Un premiu ye una distinción, un galardón o dalgo que se concede por dalgún méritu o serviciu. Polo xeneral ye una compensación como reconocencia a un esfuerzu.

    Sabemos de toles maneres que'l mundu de los premios ye, por veces, un mundu güelgosu y da pa muncho que falar.

    Pero cuando se recibe un premiu ye pa quien lu lleva motivu de gran satisfaición. Y güei puedo dicívoslo por esperiencia propia. Hónrame recibir el próximu domingu, el premiu Timón que concede l'Asociación Cultural L'Arribada de Xixón, nel marcu del Arcu Atlánticu.

    Y muncho más porque esti galardón recíbolu "en casa" y de la mano de l'Asociación Cultural L'Arribada, de reconocíu prestixu na vida cultural de Xixón y d'Asturies dende yá hai una década.

    Esti premiu ye doblemente prestoso porque nun tien calter competitivu, nun te tienes que presentar y ye un xuráu'l que valora'l to llabor nel campu de la lliteratura.

    Siéntome por ello emocionada y ye pa mi un honor recibir esti galardón. Toi mui agradecida al xuráu que valoró la mio trayeutoria como escritora y determinó que yera merecedora d'esti Timón. Amás tendré en llugar preferente na mio casa la escultura que Jesús Castañón fai pa la ocasión. Jesús Castañón ye ún de los grandes que tenemos en Asturies nel mundu del arte, polo que-y doi dende esta páxina la norabuena.

    Recibir un premiu significa munches coses. Amás del reconocimientu, como ye'l casu, ye una inyeición d'ánimu pa siguir navegando nesti mar lliterariu nel que tamos somorguiaos los y les escritores y tamién los llectores que ponen alma a lo que nosotros escribimos.

    Siéntome como si tuviere qu'en dalgún momentu garrar el timón imaxinariu d'esti barcu nel que navegamos los escritores asturianos, cargáu de pallabres, d'emociones, de sensaciones, de fantasía... Esi timón que tamién recibieron otros collacios y collacies a lo llargo d'estos años, bien merecíu, y a los que felicito por esti mediu.

    Llevaremos entre toos el timón lliterariu con tientu, pa que les nueses pallabres nun se dilían nel agua del tiempu.

    Pa que la lliteratura asturiana llegue alluende la mar.

    Pa que'l barcu de la pallabra nun vaya a la deriva.

     

    Compartir en Twitter
    Compartir en Facebook