Blog 
Filazón
RSS - Blog de MªEsther  García López

Archivo

  • 04
    Febrero
    2012

    Comenta

    Comparte

    Twitea

    Alicante

    Probeza

     Los probes tán presentes en munchos llares del nueso país

    Cuando yera nena, cada ciertu tiempu pasaben unos cuantos méndigos pel pueblu. Nosotros- llamábamos-yos «los probes». Yeren casi siempre los mesmos y pidíen de comer, panoyes, farina y otros productos de la casería. Vivíen de pidir y nós tábemos familiarizaos cola so presencia. Diben col sacu al llombu y si acasu otru pola cabeza, esfarrapaos y con ropes puerques o enllenes de remiendos. Los nenos teníamos-yos mieu. Si cuando pasaben, cuadraba que yo taba sola en casa, dába-yos una bona dadiva de coses pa que se fueran contentos y más que nada pa que marcharen rápido. Dalgunos pidíen posada, y dormíen poles cases del pueblu, nel payar, o na corte. Les families más xeneroses facíen-yos sitiu dientro y dormíen na cocina.

    Cuasique tengo na memoria a tolos «probes» que pasaben por allí. Alcuérdome con ciertu cariñu d'ún que yera mancu y siempre diba acompañáu d'animales. Mio pá nuna ocasión compró-y una oveya que llueu la tuviemos como mascota de mio y del mio hermanu. Yera aquella una oveya singular, porque nos llevaba «a caballu» como si fuera un burricu. Y pasábamoslo perbien.

    Daquella nun caía na cuenta de la situación tan triste que vivíen aquelles persones. Pero güei veo la probeza dende otru puntu de vista. Güei esmolezme que nel sieglu XXI haya n'España millones de persones que viven na llende de la miseria. Nun fai falta dir de méndigu como aquellos «probes» que diben polos pueblos hai unes cuántes décades. La situación n'Asturies ye alarmante; según l'INE, nel añu 2010 un 43,4% de families confesaben tener problemes pa llegar a fin de mes y un 12,3% viven na llende de la probeza. Sufren l'angustia y la tristura de nun tener perres pa sobrevivir y pa mantener les necesidaes básiques del llar. Güei nun se pue vivir solo de pidir porque hai otres necesidaes importantes pal individuu y que toles persones tienen derechu a satisfacer. Cola crisis, el númberu de persones en riesgu d'esclusión social (eufemismu de probe), incrementóse enforma. Y nun ye que pasen pela puerta de xemes en cuando nin que vengan d'otros llugares. Si les cifres del paru nun encomiencen a mermar, nun vamos tener qu'ocupanos de los que pasen fame n'otros llugares del mundu, porque tenemos la miseria en casa. N'Asturies siguiremos probes por munchu tiempu. Ta visto que nun somos a llevantar cabeza. Quiciabes pola nuesa «mala cabeza». Hai que pensar muncho a quien se vota y quien va mirar polos nuesos drechos y quien podría llevantar la economía del país. Nun se sabe cómo, pero embabiequen a la xente con falses promeses. L'ésitu de la drecha ta una vez más a la vista: un añu perdíu, un añu p'atrás, un añu de desgobiernu, una añu d'esbaldidores, un añu pesllando puertes dempués de llamar con insistencia a toles puertes prometiendo y pidiendo'l votu. Ye vergonzosu que tengamos qu'entamar otres eleiciones. Tres campañes electorales en menos d'un añu. Eso llámase espilfarru. Quiciabes esta nueva movida política nos faiga reflexonar a los asturianos y pensemos un poco más a quien damos el votu. D'ello depende'l futuru de la nuesa rexón. Ensin escaecer qu'a nivel del Estáu amáguennos les afilaes tixeres coles que siguen recortando y tarazándolo too. De siguir asina'l númberu de probes va siguir incrementándose.
     

     

    Compartir en Twitter
    Compartir en Facebook