Blog 
Filazón
RSS - Blog de MªEsther  García López

Archivo

  • 07
    Enero
    2015

    Comenta

    Comparte

    Twitea

    Tenrura

     

      La Navidá ye un momentu afayadizu pa reflexonar sobre la tenrura

    07.01.2015 | 03:37

    Tenrura

    Cuando nacemos, recíbenos la espresión más guapa d'amor: la tenrura. Cuando la madre y el padre nos dan los primeros besos, cuando nos abracen con fuercia, cuando nos dicen pallabres cariñoses... Les añaes dulces y los primeros poemes, sentíos dende lo más fondo del corazón... La tenrura apréciase na mirada, nes caricies, nes actitúes de consuelu. Según vamos medrando, hai munchos momentos na vida nos que necesitamos un migayu de cariñu, y non siempre lu recibimos. Hai munchos momentos nos que tenemos necesidá de que daquién nos amuese una actitú de complicidá, una sonrisa. Y non siempre nos facemos cargu del sufrimientu ayenu. La tenrura podemos dicir que ye una lluz qu'ilumina los nuesos sentíos cuando la recibimos y cuando la damos.

    En Navidá non too ye felicidá. Hai munches persones que nun reciben un abrazu nestes feches nin n'otres. Hai persones que viven con tristura estos díes de tanta fiesta, que los pasen en soledá, que nun tienen a naide que -yos dedique unos minutos, una mirada, una caricia, un besu...

    Mientres comemos les uves al son de les campanaes y brindamos cola sidra o'l cava, ente les burbuxes doraes de la publicidá, daquién, al otru llau, reclama unes faraguyes de cariñu, daquién espera a que dalguién-y apurra un afalagu o un apretón de manes pa caleceles. Estos son xestos emocionalmente saludables.

    Sicasí un xestu de cariñu ye bien recibíu en cualquier momentu. Nun tien por qué ser namás por compasión o p'alliviar la tristura.

    Quiciabes nos escaecemos de munches coses que nos van socediendo a lo llargo de la vida, pero los momentos nos que dalguién nos miró con tenrura, de xuru que nos quedaron grabaos nel nuesu corazón y qu'enxamás los escaecemos. La tenrura ye un sofitu emocional que nos ayuda a ser felices. Ye la escucha atenta a quien nun tien a quien contar, la sonrisa cómpliz, l'interés por alliviar la tristura de los demás. La tenrura sirve pa curar los males del alma, pa los qu'ahí poques melecines.

    Dicía Oscar Wilde que nel arte como nel amor ye la tenrura lo que da la fuercia. La tenrura reforza los llazos del amor y aporta seguridá a los débiles, a los abandonaos emocionalmente y priende-yos una lluz nel corazón. La falta de tenrura, va xuncida cola soledá, va xuncida al olvidu y a la indiferencia.

    Nesta sociedá d'egoísmu y escaecimientu, fáltanos una bona dosis de tenrura y d'afeutu. La soledá y la indiferencia son un mal social que nos afeuta cada día más. Ye pa reflexonar sobre ello nestes feches, pero tamién a diario, y a lo llargo de tol añu.

     




     

     

    Compartir en Twitter
    Compartir en Facebook