Blog 
Filazón
RSS - Blog de MªEsther  García López

Archivo

  • 08
    Diciembre
    2012

    Comenta

    Comparte

    Twitea

    Tiempu llibre

    Quiciabes ye'l momentu de reflexonar sobre'l valor del tiempu llibre.

    Güei tenemos una ufierta mui variada pa ocupar el tiempu llibre. Una manera d'aprovechalu ye dedicalu a actividaes d'ociu, que son les que nos faen disfrutar d'esi tiempu, que pa unos ye un periodu enforma llargu y pa otros ye bien curtiu, porque hai qu'andar mirando qué día tienes un momentu pa dedicar al espardimientu y diversión, como dicimos agora, pa «desconectar».


    La mayor parte la xente vivimos conectaos nesti mundu de prieses, nel que'l tiempu cuerre a toa mecha. Conectaos nel trabayu y conectaos a internet, a les redes sociales, contapiando y averiguando la vida de los que se «desnuden» na rede, criticando, o acompangando colos dos mil amigos virtuales que fuimos axuntando nesta aldea global que ye la Rede. Esta forma de comunicación nun ye igual que nel entornu físicu. Dar un paséu y alcontranos con xente pela calle ye bien diferente. Nesti alcuentru físicu xuega un papel importante'l llinguax verbal, al que se-y amiesta'l llinguax non verbal, y otres connotaciones, como puen ser la proximidá y el calor d'un apretón de manes, o poder disfrutar d'una sonrisa, o encendese con una discusión. Nes redes sociales sonrimos, lloramos, rímonos o enfadámonos delantre d'una pantalla. Pero ésa ye la realidá de güei, un mundu virtual nel que tamos controlaos y que nun sabemos de les consecuencies que pue tener dir dexando resclavu nel camín de la Rede, nin sabemos hasta ónde pue llegar esi control.


    Poro, quiciabes ye agora bon momentu pa reflexonar sobre la ufierta y consumu d'actividaes d'ociu. D'una parte porque, el mundu virtual, aparte de les ventaxes que nos ufierta y que toos conocemos, róbanos bona parte del nuesu tiempu, y d'otra porque bona parte del mesmu róbanoslu la televisión, enllena de programes basura, d'espacios pa entontecer a la población, d'escaparate pal famoséu, de noticies sensacionalistes, de desgracies mundiales, de tifones y terremotos, de guerres, de violencia y sangre peruquier y asina, embobaos delantre l'aparatu, perdemos parte d'esi tiempu, que nun se detién, y que nun somos quien a controlar, nin, por veces, saber disfrutalo.


    Nel entornu físicu, nesti momentu tenemos una bona ufierta cultural pa ocupar el tiempu llibre. Entovía hai xente que-y presta dir a ver una obra teatru o un conciertu, o disfrutar d'un recital de poesía en vivu y en direutu. Pero, al empar, la cultura encomienza a resentise pola mor de los «recortes». Recortes pa quien programa y recortes pa los consumidores, munchos «ensin un duru» pa poder dase un gustu cultural. Ta claro que lo qu'interesa ye una sociedá emburrecida y ensin espíritu críticu, asina ye más fácil de manexar.


    Pienso que llegó'l momentu d'alministrar con sentíu esti tiempu de folgueta que nos permite «desconectar» y disfrutar de la vida. Llegó'l momentu de dignificar l'ociu y de que nun valga cualquier cosa pa robanos esi pocu tiempu llibre, tan prestosu y necesariu pa toos nós.

     

    Compartir en Twitter
    Compartir en Facebook